García estrénase como direutor xeneral de Política Llingüística nel pieslle de la UABRA

Tamién va tar presente nel actu oficial, un añu más, el rector Santiago García Granda.

El direutor xeneral de Política Llingüística, Antón García, va acudir esta tarde al pieslle de la X Universidá Asturiana de Branu (UABRA) no que va ser el so primer actu públicu nel cargu. Celebrada ente'l 29 de xunetu y el 9 d’agostu en Cangas del Narcea, nella participaron al rodiu de 150 persones ente profesoráu y alumnos, que van recoyer esta tarde los certificaos y diplomes de los cursos que desendolcaren.

En total entamáronse trés de dos selmanes de llargor, el ‘Cursu Elemental de Llingua Asturiana’, el ‘Cursu Avanzáu de Llingua Asturiana’ y el ‘Curso de Gallego-asturiano’ (primeira fase), y trés d'afondamientu cultural y llingüísticu con una duración d'una selmana, de ‘Capacitación pa la traducción al asturianu’, ‘El patrimoniu cultural asturianu. Un averamientu dende l’enguedeyu de lo tanxible y lo intanxible’ y ‘De la lletra al testu: taller d’escritura creativa’. L'Academia de la Llingua Asturiana (ALLA) lleva diez ediciones entamando esta iniciativa, heredera de los cursos d'Ibias, gracies a la collaboración de la Universidá d'Uviéu y del Conceyu de Cangas del Narcea.

Nel actu previstu pa les 19 hores nel Paraninfu de la Universidá van intervenir, amás de García y del rector, María Cristina Valdés, direutora de la UABRA; Xosé Antón González Riaño, presidente de l'ALLA; y Laura Álvarez García, teniente d'alcalde de Cangas.