Les terraces van tar abiertes hasta les 23 hores dende'l sábadu y los interiores, hasta les 21

La vacuna d'AstraZeneca va alministrase namái a persones d'ente 60 y 65 años. El miércoles rexistráronse 146 casos nuevos de COVID-19, con una tasa de positividá del 5,06 por cientu.

La Conseyería de Salú comunicó esta mañana l'escenariu nuevu de midíes que se planteguen dende'l sábadu depués de que finen mañana les restricciones especiales de Selmana Santa. La primera ye retrasar el toque de queda, afitáu agora a les 22 hores, hasta les 23, lo que va llevar consigo un ampliamientu de los horarios en dellos sectores.

Asina, les terraces van poder funcionar hasta les 23 hores "en meses de 6 persones con una distancia de metru y mediu ente sielles", confirmó Miguel Prieto, xefe d'Alertes y Emerxencies de la COVID-19. Nel interior el númberu caltiénse en 4 "hasta les 21 hores".

Otres midíes son l'apertura de los hoteles y demás agospios, l'aumentu del aforu en centros comerciales al 50 por cientu y el retrasu del pieslle, y l'entamu de la competición nacional nel deporte en categoría absoluta y xuvenil. Mañana va espublizase nel BOPA la resolución con tolos detalles.

6 finaos

A falta de la espublización de los datos oficiales de la COVID-19, Salú comunicó 146 contaxos ayeri. Son 25 más que la xornada anterior per segundu día siguíu, yá que'l llunes la cifra foi de 96 y el martes de 121.

El Serviciu de Salú del Principáu d'Asturies (SESPA) fixo 3.535 pruebes de diagnósticu d'infeición activa, asitiándose la tasa de positividad nel 5,06 por cientu. Esta cantidá foi'l llunes del 4,27 por cientu y el martes del 3,98 por cientu, mentes qu'a 7 díes nesta xornada última, a falta de l'actualización de güei, el porcentaxe quedó nel 5,12 por cientu.

Produxéronse seis muertes, la de cuatro muyeres de 93, 88, 85 y 82 años y la de dos homes de 83. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.916 persones.

Hai hospitalizaos 161 pacientes con confirmación o sospecha de COVID-19, a los qu'hai que sumar otros 63 que tán na UCI. Son 14 y 3 menos que'l martes, de manera respeutiva.

31 biltos activos

Asturies informó al Ministeriu de Sanidá de la esistencia de 31 biltos activos, 4 menos qu'hai una selmana y 9 qu'hai dos, con un total de 245 casos. 7 d'ellos detectáronse estos 7 díes últimos, comunica la conseyería.

Cambiu na previsión

El Conseyu Interterritorial del Sistema Nacional de Salud alcordó ayeri llendar la vacunación con AstraZeneca a les persones d'ente 60 y 65 años col sofitu de toles autonomíes a esceición de la Comunidad de Madrid, que votó en contra, y Euskadi y Ceuta, que s'astuvieron. Esta decisión llega tres la conclusión de l'Axencia Europea del Medicamentu de los posibles venceyos de los casos de trombos cola puesta del preparáu d'Oxford, principalmente en muyeres menores de 60 años, anque caltién que supón más riesgu el nun vacunase que facelo.

Na semeya, una terraza en Xixón esti meudía.