Salú comunica 121 contaxos, con una tasa de positividá del 3,98

|
Vacunación a mayores de 80 años

Dos residencies de Xixón rexistren biltos con 11 afeutaos, toos ellos asintomáticos.

A falta de la espublización de los datos oficiales de la COVID-19, la Conseyería de Salú informó de la detección ayeri de 121 contaxos –l'actualización suma otru casu p'algamar los 122–. Son 25 más que'l llunes, anque la tasa de positividá diaria foi menor: 3,98 por cientu tres la realización de 3.720 pruebes de diagnósticu d'infeición activa pol 4,27 por cientu del día anterior, cuando se fixeron 3.039 tests.

A 7 díes esa xornada esti porcentaxe yera del 5,60 por cientu –ayeri baxó al 5,12 por cientu–. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

Ayeri rexistráronse trés muertes: dos homes de 86 y 76 años y una muyer de 87. Dende qu'entamó l'andanciu finaron 1.910 persones cola enfermedá causada pol coronavirus SARS-CoV-2.

Hai hospitalizaos 175 pacientes con confirmación o sospecha de COVID-19, a los qu'hai que sumar 66 que tán na UCI. Son 13 y 2 menos que'l llunes, de manera respeutiva.

Efeutividá de la vacuna

Salú detectó dos biltos de coronavirus en residencies de persones mayores, lo qu'implica más de trés casos, cuando la selmana pasada hebo ún. Los centros afeutaos son la Mesta de Pumarín y Palacio de Caldones, entrambos en Xixón.

Tán afeutaes 11 persones, toes asintómaticos, confirmando asina l'efeutividá de la vacuna de la COVID-19. Del 30 de marzu al 5 d'abril rexistráronse 12 positivos en 10 de los 270 centros qu'esisten n'Asturies, asina como 6 finaos con PCR positiva con domiciliu nellos, ún menos que la selmana anterior.

Contador Estadistiques