La vacunación con AstraZeneca amplíase al grupu de 56 a 65 años

Esti miércoles torna a entamase n’Asturies la vacunación con dosis d’AstraZeneca tres la paralización decidida la selmana pasada. El Conseyu Interterritorial del Sistema Nacional de Salud acordó por unanimidá ampliar al grupu d’edá de 56 a 65 años la so puesta a propuesta de la Comisión de Salud Pública.

“Inclusive ye mui problable que s’amplíe dalgo más a razón de los resultaos d’un ensayu clínicu que se ta espublizando güei mesmo –por ayeri--”, aseguró Pablo Ignacio Fernández Muñiz, conseyeru de Salú, tres l’aconceyamientu celebráu de manera telemática. Hasta la fecha nun se diera esti pasu por mor de que les pruebes feches nun primer momentu por AstraZeneca nun incluyía estos grupos d’edaes, pero otros estaos yá veníen vacunando a mayores de 55 y los estudios últimos valoraos dan seguranza agora al Ministeriu de Sanidá y les autonomíes pa dar esti pasu.

Otra manera, esta mañana na Xunta Xeneral Fernández Muñiz recordó qu’Asturies ye la comunidá con mayor porcentaxe de población cola pauta completa de vacunación, concretamente un 7,50 por cientu, lo que supón un total de 76.722 persones con inmunización énte la COVID-19. “Esti procesu nun ye una carrera, pero sí hemos ser áxiles, y los datos amuese que lo tamos siendo”, añadió.

Los menores de 80 años, dende’l 5 d’abril

El Serviciu de Salú del Principáu d’Asturies (SESPA) va entamar n’abril la citación automática per vía telefónica pa la inmunización de les persones de menos de 80 años coles vacunes de Pfizer y Moderna. Sacante cambios d’última hora, será dende’l día 5.

Semeya obra d'Armando Álvarez