Les llingües minorizaes protagonicen el VI Festival Arcu Atlánticu

L’occitanu, l’asturianu y el mirandés, l’eusquera, el bretón y el gallegu van ser el centru d’atención del VI Festival Arcu Atlánticu, que comienza esti martes y va allargase hasta’l domingu baxo’l lema ‘Un mar de llingües’. Juan Carlos Moreno Cabrera pon la charra inaugural, que trata sobre los idiomes como patrimoniu cultural.

Tres tar dedicáu a países como Portugal o Éire, o ciudaes como Naunnt o Lisboa, nesta ocasión la Fundación Municipal de Cultura, Educación y Universidá Popular decidió poner el focu nes llingües minorizaes del arcu atlánticu. Asina, va haber cinco xornaes dedicaes a caún de los idiomes minoritarios de la parte continental, amás d’una más xeneral que va conformar güei la xornada inaugural.

Ésta ta protagonizada por Moreno Cabrera, caderalgu de Llingüística Xeneral na Universidad Autónoma de Madrid, y lleva’l nome de ‘Las lenguas como patrimonio cultural europeo’, a lo que va siguir un recital poéticu en llingües minoritaries musicalizáu cola harpa de Dani García de la Cuesta. La primer actividá va comenzar a les 18.45 hores nel salón d’actos del Centru de Cultura Antiguu Institutu, mentes que la segunda ta prevista pa les 20 hores nel patiu de la instalación.

La xornada de mañana va tar dedicada al occitanu, cola presencia a les 18 hores na plaza de la Casona Xovellanos de Rosa María Medina, profesora titular de Llingüística Románica de la Universidá d’Uviéu y presidenta de l’Associacion Internacionala d’Estudis Occitans, que va poner la conferencia ‘¿Pue una ‘civilización’ salvar una llingua’ dientro del ciclu ‘Conociendo les llingües atlántiques’. Mentes, el xueves, l’asturianu y el mirandés van ser los protagonistes, destacando la emisión en direutu de ‘Iniciativa pol Asturianu nes ondes’ (17 hores) na plaza de La Corrada, mesmu llugar onde a les 18 hores Alcides Meirinhos va dar la charra ‘Mirandés, ¿fálase asturianu en Portugal?’, y, a les 18.45 hores, Xandru Martinu, Pablo Rodríguez Medina y Ramón d’Andrés van facer lo propio con ‘L’asturianu ente les llingües del Arcu Atlánticu’.

L’eusquera ye la llingua convidada del vienres, cola presencia de Koldo Ulibarri, doctor en Filoloxía Vasca, a les 18 hores na plaza d’Arturo Arias, conocida popularmente como la d’El Lavaderu, pa falar de ‘El milagro de la recuperación del eusquera’. La música y gaitera Marie La Cam, a la mesma hora na plaza de la Casona Xovellanos, va tar presente’l sábadu pa falar de ‘L’estáu actual de la llingua bretona’ y pa finar, el domigu na plaza de La Corrada la escritora y profesora de Filoloxía Gallega na Universidade da Coruña, Goretti Sanmartín, va afondar en ‘Un casu pa deprender, el gallegu.

Cursín d’asturianu

Amás de toes estes conferencies al rodiu de les llingües minorizaes del arcu atlánticu, el festival entama una cantidá grande d’actividaes onde la música, la lliteratura, el teatru, los deportes tradicionales y la gastronomía son protagonistes. Tamién la llingua asturiana, con recitales poéticos o l’entamu d’un cursín d’asturianu p’averase al idioma que va dase dende güei y hasta’l sábadu na Casa’l Chinu, a les 18 hores esta tarde y a les 19 el restu de díes.

El V Salón d’Agroalimentación y Turismu del Arcu Atlánticu, n’El Muelle, o la presencia nos Xardinos de la Reina de la ciudá de Le Mans y les comunes de Saumur y Fontevraud-l'Abbaye, o d’un mercáu portugués en Campu Valdés entamáu por Viana do Castelo, son otres de los munchos eventos del VI Festival Arcu Atlánticu. Pue consultar el programa completu calcando equí.

Polémica pol vetu d’una charra a la XDLA

Esta edición del Festival Arcu Atlánticu tuvo marcada tamién pola polémica pol vetu d’una charra de la Xunta pola Defensa de la Llingua Asturiana (XDLA) por parte de la organización del certame al considerar que yera política. Ello provocó qu’esti coleutivu refugara participar nel Arcu Atlánticu y que Xixón Sí Puede decidiera quitar el so sofitu al festival por entender esta midida como una censura.

Finalmente, Alcaldía rectificó y va poner toles facilidaes a la XDLA pa que pueda presentar el so ‘Proyectu 2018 pa la Oficialidá’ nel mes de setiembre.