Xixón Sí Puede anuncia que se desmarca del Festival Arcu Atlánticu

|
Mario Suárez del Fueyo

Salvo que Foro rectifique nel casu del vetu a la XDLA pa poner una conferencia.

La negativa de la Fundación Municipal de Cultura, Educación y Universidá Popular a programar una charra nel Festival Arcu Atlánticu de la Xunta pola Defensa de la Llingua Asturiana (XDLA) sobre la iniciativa ‘Proyectu 2018 pa la Oficialidá’ lleva a Xixón Sí Puede a desmarcase del certame si'l "equipu de gobiernu nun rectifica y retire'l vetu" a la organización cívica. "Suena a censura, tiempos vieyos que yá habíen tar superaos nos que s'afalaba a la xente a 'nun metese en política'", apunta la candidatura de xunidá popular nun comunicáu dau a conocer enantes del actu de presentación del programa d'esti añu.

"Estes palabres escuenden un vetu a les idees y a la llibre espresión que nun se pue consentir dende una institución democrática. Por esti motivu, demandamos al equipu de gobiernu que rectifique nel intre y llevante'l vetu a una organización que nestos años nun fixo otro que mirar pola sobrevivencia la llingua, supliendo l'arrequexamientu al que la vienen sometiendo les alministraciones asturianes", afirmó Mario Suárez del Fueyo, voceru de Xixón Sí Puede, que considera que, al empar, la conceyalía de Cultura quier tapacer la visión que se caltién dende la institución municipal de la llingua y la cultura asturiana. "El marcu políticu y xurídicu nel que se desenvuelve una llingua ye clave p'atalantar cuála ye la so situación y cuál pue ser el so futuru, asina que nun tien xacíu nengún torgar una charra na que precisamente se va a falar d'esi marcu nel contestu d'un Festival dedicáu a les llingües minorizaes. A nun ser, claro ta, que lo que se quiera ye evitar falar del ruinu marcu actual al que dellos partíos, ente ellos Foro, condenen a la llingua asturiana", añade.

Por ello, salvo rectificación del equipu de gobiernu, Xixón Sí Puede anuncia que nun va sofitar esti añu y no socesivu'l festival, un eventu "qu'había servir pa dar un pasu alantre pa la sobrevivencia de la llingua asturiana y non ser un simple escaparate nel que se dexa ver cómo da les boquiaes una parte fundamental del nuesu patrimoniu inmaterial".

Contador Estadistiques