Les Comadres abre l’Antroxu asturianu modernu

|
Evaristo Valle mazcarada d'Uviéu

Asturies va vivir dende esta nueche cinco díes de folixa, mázcares y gastronomía. Llega l’Antroxu, festividá asturiana que nel pasáu entamaba col solsticiu d’iviernu y qu’agora, tres la recuperación acontecida col fin del franquismu, resúmese a les xornaes previes al Miércoles de Ceniza, primer día de la Cuaresma.

La primer cita ye’l Xueves de Comadres, xornada na que les muyeres axunten pa comer y pasar una xornada festiva. Anque l’orixe d’esta folixa pue tar fuera del Antroxu tradicional, esta cita tan asturiana considérase l’entamu del Antroxu modernu. Xixón y La Pola Siero son les villes que nos años últimos mantienen con fuercia esta tradición que caltuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles. Güei, la folixa treslladóse de la tarde a la nueche y munchos restoranes ofrecen menús especiales pa esta xornada.

El llabor de la Tertulia Feminista Les Comadres

Ye de destacar tamién el llabor de la Tertulia Feminista Les Comadres pa potenciar esta fecha festiva. Esti grupu de muyeres solía entamar tolos años una espicha na qu’entreguen dos premios: el ‘Comadre de Oro’ y el Felpeyu, ésti últimu a persones o entidaes que desprecien a la muyer. Nesta ocasión la folixa repite plaza, la sala Acapulco, onde s’entama una cena con una actuación.

La premiada esti añu ye la profesora titular de profesora titular de Socioloxía del Xéneru y Directora del Centro de Estudos de Xénero e Feministas de la Universidade da Coruña, Rosa Cobo, “pol continuáu llabor investigador, que la convertió nun referente imprescindible del activismu feminista”. Leticia Dolera, Flor de Torres, Beatriz Gimeno y Mercedes Bengoechea yeren les otres candidates qu’aspiraben al gallardón que llevó l’añu pasáu la profesora titular de Derechu Constitucional de la Universitat d’Alacant y cofundadora de la Red Feminista de Derecho Constitucional, Mar Esquembre, que confirmó la so asistencia a la celebración d’esta nueche.

Nel llau de los antipremios, el títulu de Felpeyu recala nos abogaos de los acusaos d’una violación en grupu n’Iruña mientres unos sanfermines, que se facíen llamar ‘La Manada’, Agustín Martínez Becerra, Juan Manuel Canales Cid y Jesús Pérez Pérez, “por basar la so defensa na demonización de la víctima”. El primer d’ellos amosó’l so interés n’acudir a la celebación d’esta nueche pa tratar d’esplicase, dalgo que dende la tertulia refugaron al unviar siempre’l Felpeyu per corréu al entender que la presencia de los antipremiaos, pola so repercusión mediática, tapecen a la protagonista, la ‘Comadre de Oro’. Otra manera, Antonio Adán, Pablo Motos, Javier Marías y Carlos Herrera tamién tuvieron opciones de recibir esti ‘reconocimientu’.

La folixa va tener llugar nel Acapulco a les 20.30 hores y va consistir nuna cena namái pa muyeres y una actuación d’Assia, con un preciu de 30 euros. Tamién esiste la posibilidá d’acudir sólo al baille, a partir de la medianueche, al que tien accesu’l públicu en xeneral.

Rio de Janeiro o Tenerife ganen a la tradición

Los antroxos de Xixón y Avilés son los más importantes en cuantes a programa institucional y participación. Música y delles actividaes más orientaes a asemeyase a los carnavales de Rio de Janeiro, Tenerife, Las Palmas o Cádiz qu'a otra cosa, protagonicen estes xornaes na que la xente participa antroxándose, anque con mázcares lloñe de la tradición. Los vienres ye habitual ver a los neños antroxaos nos colexos y en Xixón les charangues calecen motores pal concursu d’estes formaciones del sábadu y del domingu, que yá va pola so trentena edición, con una participación alta.

El sábadu los focos van p’Avilés, onde se celebra’l XXXI Descensu Internacional y Fluvial de Galiana a partir de les 18.30 hores cola participación esti añu de 19 artiluxos. Una gran cantidá de chigres de la ciudá antróxense pa estos díes –nesti añu la temática ye África– pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, sobre manera la más mozo.

El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte.

Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos y les picatostes.

Celebración en Cuaresma

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como ye’l casu de Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa, asina como otru de Pilar Sánchez Vicente entituláu 'L'Antroxu'. Los más mozos tamién pueden averase a esta celebración col reportaxe de la nuesa estaya infantil 'A la Gueta los Suaños'.

Contador Estadistiques