L'ascensu de contaxos nun apara: 664 el xueves

Torna a superase per segunda xornada'l récor de la pandemia, al igual que la tasa de positividá, que llega al 11,01 por cientu.

Lloñe de disminuyir magar les midíes restrictives tomaes pol Gobiernu, los contaxos nun dexen de xubir n'Asturies. A falta de conocer los datos oficiales, la Conseyería de Salú comunicó ayeri 664, 59 más que'l miércoles, cuando se rexistró la cifra más alta de tol andanciu.

La tasa positividá tamién ye de récor, al llegar al 11,01 por cientu tres la realización de 6.029 pruebes PCR. Nes 24 hores anteriores quedó nun 10,26 por cientu.

Na xornada hai que llamentar 14 muertes: siete muyeres de 103, 92, 89, 83, 83, 79 y 76 años y siete homes de 91, 87, 87, 86, 83, 80 y 77, de los que siete teníen residencia en centro de mayores. Dende qu'entamó l'andanciu 665 persones perdieron la vida con COVID-19 nel país.

Al finar el día d'ayeri taben hospitalizaos n'Asturies 843 pacientes con confirmación o sospecha de tener la enfermedá causada pol coronavirus SARS-CoV-2, amás d'otros 138 na UCI. Son 20 y 5 más que'l miércoles, de manera respeutiva.