Asturies supera los 600 contaxos nuna xornada

|

La tasa de positividá d'esti miércoles tamién ye la más alta hasta la fecha: 10,26 por cientu.

Los contaxos siguen xubiendo n'Asturies magar les midíes restrictives que tomó'l Gobiernu. Una selmana depués d'adelantar el toque de queda y de pesllar los chigres y el restu de comercios non esenciales, tornar a superar el récor de casos rexistraos nuna xornada.

La Conseyería de Salú anunció 605 positivos ayeri. Hasta'l momentu la cifra más alta yeren los 574 del xueves pasáu.

La tasa de positividá tamién supera a la mayor rexistrada en tola pandemia. Ye del 10,26 por cientu (5.893 pruebes PCR), cuando'l xueves pasáu foi del 10,16 por cientu.

Na xornada hai que llamentar 11 muertes: seis homes de 93, 92, 84, 83, 60 y 55 años y cinco muyeres de 95, 92, 70, 66 y 65, siete d'ellos con residencia en centros de mayores. Sicasí, los datos oficiales comunican 16, que ponen el total de finaos en tol andanciu en 651.

Nestos momentos hai hospitalizaos 823 pacientes con confirmación o sospecha de COVID-19, amás d'otres 133 persones na UCI. Son 17 y 5 más qu'ayeri, de manera respeutiva.

46 biltos activos

Asturies comunicó al Ministeriu de Sanidá la esistencia 46 biltos activos, 13 más qu'hai una selmana. 16 d'ellos detectáronse esta selmana.

Contador Estadistiques