L’Anuariu de la Música Asturiana del 2022 repasa un añu de “optimismu ensin trunfalismu”

La variedá y calidá de la música asturiana d’anguaño, qu’emplega cualesquier de les llingües falaes nel país, ye un fechu que rescampla l’Anuariu de la Música Asturiana del 2022 nel so editorial. Ésti entitúlase ‘Optimismu ensin trunfalismu’ y recuerda que, coles bases feches, namái falta l’apoyu del Gobiernu y RTPA pa caltener esta escena.

Goxe Producciones edita un añu más esta revista que fai un repás musical a los 12 meses previos y vien acompañada por un CD con una esbilla de la producción fecha nesi tiempu. Cróniques, entrevistes, informes, opinión, reportaxes o anuncies apaecen nesti númberu que se centra na música tradicional, el folk, el rock o’l cantar d’autor y que lleva en portada a Algaire baxo’l titular ‘L’añu d’Algaire’.

El siempre esperáu editorial entitúlase nesta ocasión ‘Optimismu ensin trunfalismu’, que fala de la variedá y calidá de la música asturiana d’anguaño. Rellata que “les bases tán puestes”, en referencia a la esistencia de creación y de consumidores, “agora namás falta que los poderes públicos del país, particularmente’l Gobiernu asturianu y la RTPA, apoyen amañosamente con polítiques y acciones reales, permanente y ambicioses. Nun cabe ser trunfalistes y hai que siguir trabayando, pero paga la pena aparar per un momentu, mirar atrás, sentir satisfacción pola xera fecha y coyer impulsu pa siguir alantre”.

Encuesta a los candidatos pa les eleiciones del 28-M

Ente los conteníos d’esti númberu atopamos la crónica ‘Un bon añu pa la música celta n’Asturies’ y ‘Una crónicaa musical dende l’An Oriant más asturianu’; l’informe ‘Política Llingüística vs música n’ast’ qu’analiza les aiciones y prespuestu de l’Alministración nel campu musical; el reportaxe ‘Música urbana n’asturianu’; y artículos dedicaos al trentena quintu aniversariu de Dixebra y de Los Berrones. Tamién hai entrevistes a José Manuel Tejedor y a Algaire, y, como novedá, una encuesta fecha a candidatos confirmaos pa les eleiciones del 28-M o representantes de los partíos con representación parllamentaria “que nun nieguen el derechu d’Asturies al autogobiernu”, cola esceición única de Ciudadanos, que refugó participar, sobre la escena musical asturiana y les polítiques pa la so promoción.

Completa la revista la seición ‘Collecha’, con toles producciones musicales y bibliográfiques del 2022. El CD que l’acompaña, mentes, inclúi 19 cortes de Burbús, Fruela 757, Mostru l’Horru, Alfredo González, Nacho Vegas, Dixebra, La Tarrancha, Misiva o Pop Piquiñín.

L’Anuariu de la Música Asturiana 2022 ta disponible de baldre nos puntos de distribución habituales. Goxe Producciones ye la responsable de la edición nesta dómina d’una espublización con más de venti años de vida, que se financia namái con publicidá.