L’Anuariu 2023 apunta que la música asturiana tien “entidá suficiente como pa tener un tratamientu específicu” en RTPA

Más de cuarenta producciones ente discos, EPs y cenciellos dixitales, producciones bibliográfiques y audiovisuales conformen la collecha que recueye l’Anuariu de la Música Asturiana 2023. “La historia y la importancia de la música asturiana fai que cuente con una entidá suficiente como pa tener un tratamientu específicu nel ente de comunicación públicu”, apunta na so editorial, na que se demanda “un programa concretu nel que tratar tolo relativo a la mesma”.

Entituláu ‘Responsabilidá pública’, nél fálase del papel que l’Alministración debiera xugar na promoción y apoyu a la escena musical propia, centrándose sobre manera na RTPA como ferramienta clave pa ello como asocede n'otres autonomíes, de manera especial la RPA al ser la radio un “mediu particularmente amoñosu pal so espardimientu”. Considera que “ye más que necesario” un programa que-y dea “un enfoque global” a la música asturiana, “conociendo la so historia, novedaes, noticies, publicaciones, actuaciones… Un espaciu que promueva l’interés por ella y que cree un públicu estable, que consuma los sos productos y vaya a disfrutar del directo de los y les sos artistes”.

Los llectores van atopar nesti númberu del Anuariu, que presenta a La Bonturné en portada, 100 páxines con numberosos conteníos. Rescamplen la crónica entitulada ‘De Glasgow a Villaviciosa pasando por Ortigueira’, un resume de l’actividá de la música folk del añu o l’informe ‘Del cine mudu al españíu del 2023: una historia del videoclip n’asturianu’, sobre l’audiovisual musical del país dende lo primero del sieglu XX.

El reportaxe ‘Prohibío cantar n’asturianu nestes fiestes’ céntrase na polémica vivida en Xixón pol intentu de vetu de VOX dende Festexos a los artistes qu’empleguen la llingua asturiana y ‘Somos mundiales’, de la internacionalización de la nuesa música. Tamién hai espaciu pa recordar a Xulio Ramos y pa entrevistes a La Bonturné, Alienda y Rodrigo Cuevas.

L’Anuariu zárrase, como ye vezu, cola sieición ‘Colllecha’, qu’inclúi toles producciones del 2023. La revista acompáñase amás col tradicional CD qu’inclúi una esbilla de diecisiete cantares asoleyaos esi añu por bandes o artistes como Antón Menchaca, 6 Riales, Calea, Mapi Quintana, Haim Fernández, Bango, Ana Lamela o Diañu Blues, cortes nes qu’atopar estilos tan diversos como rock, folk, pop o canción d’autor.

Goxe Producciones encárgase de la edición de la revista, con más de dos décades de vida, nesta dómina de la espublización. Repártese de baldre y dende la selmana pasada yá ye posible atopala nos puntos de distribución habituales.