L’editorial del Anuariu de la Música Asturiana pide crear una Axencia de les Industries Culturales Asturianes

Con Baxel, el dúu folk formáu por Rigu Suárez y Paul Balmori, en portada, sal a la cai l’Anuariu de la Música Asturiana, que fai repás a tolo asocedío na escena nacional nel 2021. Nel editorial, entituláu ‘Política musical y financiación’, reclámase la creación d’una "imprescindible" Axencia de les Industries Culturales Asturianes que lleve alantre una política musical "acertada y permanente”.

Reportaxes, informes, entrevistes, crítiques, opinión, recoyida de material y anuncies conformen, como ye vezu, l’Anuariu de la Música Asturiana. Goxe Producciones asoleya, nesta segunda dómina, un añu más esta espublización de baldre con más de dos décades de vida financiada namái con publicidá, que vien acompañada del tradicional CD con cortes d’artistes como Calea, Abéu, Luis Núñez, Avientu, Ochobre, Diañu Blues, la Banda Gaites Camín de Fierro o Baxel.

La editorial d’esti añu fala de la necesidá d’una política musical “acertada y permanente”, y pide la creación d’una Axencia de les Industries Culturales Asturianes que la entame. “Los poderes públicos del país han empezar a ser conscientes de la importancia y potencialidá del fechu musical asturianu, que xenera dinamismu y riqueza nel territoriu; tienen que dir más allá de les acciones puntuales o coyunturales y entamar una política musical con mayúscules. Ye’l momentu d’un plan global qu’incluya idees, voluntá de llevales alantre, persones al frente que conozan el sector y financiación amañosa. Una dotación económica que vaiga empobinada a onde realmente se necesita y pueda ser mas productiva, que pueda facer llegar al sector onde por sí solu nun ye quien”, desendolca’l testu.

Los conteníos

Ente los conteníos d’esti númberu, correspondiente al 2021, rescamplen el reportaxe ‘Un añu de ‘Asturies, Cultura en Rede’, l’informe ‘Nuevu, vieyu y renováu rock n’asturianu’ que fala de la situación des la escena anguaño, una crónica de les I Xornaes del Vigulín Tradicional n’Asturies que tuvieron llugar en Piloña y l’artículu ‘El valor d’una guaḥa quirosana’ d’Héctor Braga sobre Diamantina Rodríguez. Tamién inclúi entrevistes a Fernando Valle Roso, Llevólu’l Sumiciu, Xune Elipe y Antón García.

El volume complétase cola seición ‘Collecha’ con toles producciones musicales asturianes del 2021. Los puntos de distribución d'esti Anuariu de la Música Asturiana son los habituales.