L'ALLA pide que se modifiquen los decretos estatales pa incluyir la especialidá d'asturianu

|
L'ALLA pide que se modifiquen los decretos estatales pa incluyir la especialidá d'asturianu

L'Academia de la Llingua Asturiana  pide a la Conseyería d’Educación y Cultura del Gobiernu del Principáu d’Asturies que nun contribuya, magar seya de mou involuntariu, a semar más confusión ente la comunidá educativa d’Asturies y qu'empobine a una negociación seria y rigurosa coles próximes autoridaes educatives del Estáu que lleve a un cambéu de los decretos d’especialidaes.

Nun comunicáu,  l'ALLA espón la so posición contraria a que la creación de la especialidá d'asturianu seya a traviés d'un decretu autonómicu. Considera que la regulación d'especialidaes ye competencia del Ministeriu d'Educación y que l'ordenamientu actual nun contempla especialidaes de calter autonómicu. 

Nesti sen, el Conseyu Escolar del Estáu (muérganu institucional que desarrolla un llabor consultivu, d’asesoramientu y propuestes al Gobiernu del estáu en rellación con los distintos aspeutos del sistema educativu español) propuso no que cinca a la posibidá de reconocimientu de la especialidá docente de Llingua Asturiana ye que los reales decretos amiesten un apartáu que diga: "Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva". Siendo esta la posición que tamién defende l’Academia de la Llingua Asturiana.

Dende l'ALLA ven llamentable dexar pasar una oportunidá que vien sofitada, ente otres instituciones y coleutivos, polos sindicatos mayoritarios de la educación pública n’Asturies, poles asociaciones de padres y madres con más implantación na nuesa comunidá, pola Xunta Xeneral del Principáu d’Asturies, pola Xunta de Personal Docente non universitariu, pol Conseyu Escolar del Principáu y pol propiu Conseyu Escolar del Estáu.

Finen el so comunicáu faciendu un recordatoriu a que esta situación y otros problemes que torguen el normal allugamientu normativu de la llingua asturiana y la so dignificación nun desapaecerán dafechu mentantu l’idioma de los asturianos nun algame l’estatus, xurídicu y constitucional, d’oficialidá.

 

Contador Estadistiques