La solución pa la creación de la especialidá será un decretu autonómicu

El Ministeriu d’Educación, Cultura y Deporte entamará una comisión de trabayu xunto cola conseyería pa la creación de la especialidá docente de Llingua Asturiana y Lliteratura. La solución propuesta dende Asturies ye la ellaboración d’un decretu autonómicu.

Los contautos ente’l conseyeru nuevu, Genaro Alonso, y el ministru tamién nuevu, Iñigo Méndez de Vigo, principiaron n’agostu con un alcuentru nel que tuvieron presentes Marcial Marín, secretariu d'Estáu d’Educación, Formación Profesional y Universidaes; Gabino de Lorenzo, delegáu del Gobiernu estatal n'Asturies; y Victorina Fernández, la direutora xeneral de Formación Profesional, Desarrollu Curricular y Innovación Educativa del Gobiernu nacional. Nella Alonso entregó una carta a Méndez de Vigo cola vieya demanda de la comunidá educativa asturiana, pidimientu que repitió na Conferencia d’Educación última celebrada’l 13 de dichu mes.

A diferencia de les escuses daes n’ocasiones anteriores, nes que se facía referencia a la falta d’oficialidá del idioma, el ministeriu contestó a la Conseyería d’Educación y Cultura n’avientu que la creación de la especilidá “escapa al ámbitu competencial del Estáu”, lo que llevó a Alonso a solicitar una reunión urxente con Marín, que tuvo llugar el día 23 na sede del ministeriu cola presencia tamién del direutor xeneral d’Evaluación y Cooperación Territorial, José Luis Blanco. Nella alcordóse l’entamu d’una comisión de trabayu pa la ellaboración d’un decretu autonómicu d’especialidá de Llingua Asturiana y Lliteratura –Gallego-asturiano, nel so ámbitu– na que participirán conseyería y ministeriu.

“Énte l’afirmación rotunda de qu’escedía l’ámbitu competencial propiu –en referencia al ministeriu–, esiximos iniciar pela nuesa cuenta la creación d’un decretu d’especialidá y convenimos la creación d’una comisión de trabayu al más altu nivel na que taría’l direutor xeneral d’Evaluación y Cooperación Territorial, y, por parte d’esta conseyería, yo mesmu y la secretaria xeneral téunica”, esplicó Alonso esta fin de selmana sobre la reunión del 23 d’avientu.  

Primer reunión, el 9 de marzu

El primer aconceyamientu de dicha comisión va celebrase’l 9 de marzu en Madrid. Nella va presentase “un borrador de decretu tendente a la creación d’esta especialidá que ye una esixencia irrenunciable y una prioridá pa esti Gobiernu, y esperamos d’esta manera desbloquiar esta situación que dura yá varios años”, afirmó’l conseyeru.