Los versos de Xosé Bolado y la so memoria siguen con nós

L’Academia de la Llingua Asturiana (ALLA) presentó’l llibru homenaxe a Xosé Bolado ‘N’harmonía. Agora que sigues con nós...’ esti sábadu nun actu col que quería tamién recordar la so memoria. Compañeros na institucion académica, familiares y collacios lleeron dalgunos de los poemes recoyíos nesta obra, númberu 49 de la coleición 'Llibrería Académica'.

Xosé Antón González Riaño, presidente de la ALLA, y Aurelio González Ovies presidieron l’actu. El primeru faló a los asistentes de la figura de Bolado, fináu en mayu, y la so importancia y implicación cola institución y la lliteratura asturiana, mentes que’l profesor de la Universidá d’Uviéu fixo un repás curtiu de la poética del autor homenaxáu, afondando nel so llinguaxe poéticu y les sos carauterístiques más señalaes.

L’homenaxe peslló cola llectura de dellos poemes inxertos en ‘N’harmonía. Agora que sigues con nós...’ col acompañamientu musical de María Álvarez Santiago. La conseyera de Cultura, Política Llingüística y Turismu, Berta Piñán, xuntóse a persones como Ana María Cano, Xosé Ramón Iglesias Cueva, Taresa Lorences, Paz Fonticiella, Pablo Texón, Marta Mori, Cristina Valdés, Pilar Fidalgo y Emilia Vázquez pa lleer énte l’audiencia versos de Bolado incluyíos nesti volume que recueye creaciones de so asoleyaes en ‘Lliteratura’, ‘Lletres asturianes’ o ‘Lletres lliterariu’.

Na semeya, Vázquez, compañera de Bolado, llee unos versos. Na imaxe d'abaxo, cubierta del llibru, diseñada por Neto.