L’agua nun va frenar la celebración de la Fiesta de la Oficialidá en Bimenes

|
Casa Conceyu Bimenes

Bimenes ta pendiente del cielu cola esperanza de que dea un tregua pa la celebración esti sábadu de la XXII Fiesta de la Oficialidá, qu’adelanta fecha esti añu. Una carpa permite l’entamu de tolos eventos festivos, mentes que los institucionales pasarán a la Casa Conceyu.

La predicción de l’Axencia Estatal de Meteoroloxía (Aemet) pa mañana señala que Bimenes va alborecer con sol, cola posibilidá de qu’haya tormenta a lo llargo del día. Por ello previsiblemente la llectura del pregón y les intervenciones del alcalde Aitor García Corte y del so homólogu de Miranda de l Douro, territoriu portugués hermanáu col conceyu yerbate, pasen a celebrase nel interior del edificu consistorial asitiáu en Martimporra.

El pregoneru de la XXII Fiesta de la Oficialidá, que va comenzar a les 12.30 hores, va ser Xosé Antón González Riaño, presidente de l’Academia de la Llingua Asturiana. “Per equí yá pasaron a lleer el pregón Ana María Cano y Xosé Lluis García Arias, polo qu’esti añu convidóse a González Riaño por ser ésti’l so primer añu como presidente de la institución”, esplica Daniel Cueli, téunicu d’Emplegu y Desarrollu Local del Ayuntamientu de Bimenes.

El restu de la fiesta que conmemora la declaración d’oficialidá nel conceyu’l 5 de xunetu del 1997 –torgada pol Tribunal Superior de Xusticia d’Asturies un añu depués tres un recursu de la Delegación del Gobiernu estatal n’Asturies, con sentencia ratificada pol Tribunal Supremu, y declarada otra vuelta nel 2016– va desendolcase na carpa instalada nel Palaciu del Marqués de Casa Estrada. A les 14.30 hores va celebrase una xinta popular, pa la qu’hai apuntaes más de 300 persones, cifra mui asemeyada a la d’ediciones anteriores.

Los Gascones van animar la folixa con actuaciones a les 16.30 y a les 20 hores, mentes qu’a les 17.30 hores va celebrase’l XXV Campeonatu Oficial d’Escanciadores y V Concursu d’Escanciadores de Bimenes, puntuables pal Campeonatu d’Asturies. A les 20.30 hores María Vázquez y Pau Santirso van poner un taller de danza ente los presentes pa preparase pal Bimenes en Danza previstu pa les 20.30 hores con Los Gascones, Herbamora y Cantaruxare, que va allargase hasta bien entrada la nueche.

Otra manera, a lo llargo del día, si’l tiempu lo permite, va instalase un mercáu agroalimentariu y artesanu.

I Campeonatu de Tute pola Oficialidá

Como actividá previa, enmarcada dientro de la nomada Selmana pola Oficialidá, va entamase’l I Campeonatu de Tute pola Oficialidá. Va comenzar a les 21.30 hores na carpa instalada nel Palaciu del Marqués de Casa Estrada y la inscripción por pareya ye de 20 euros, con premios pa los trés primeros clasificaos y los trés meyores de la repesca.

La xente interasao en participar ha de llamar al númberu de teléfonu 617.919.175. El chigre de la folixa va tener callos como platu especial pa la cena.

Contador Estadistiques