La XXII Fiesta de la Oficialidá en Bimenes adelántase a esti sábadu

|
Cartelu XXII Fiesta de la Oficialidá

La coincidencia del primer sábadu de xunetu col XLI Festival de la Sidra de Nava lleva al Conceyu de Bimenes a adelantar la XXII Fiesta de la Oficialidá a esti sábadu. Mientres tola selmana entámense actividaes dende l’Ayuntamientu al rodiu la folixa na nomada Selmana pola Oficialidá.

Al igual qu’asocediera nel 2012, el primer sábadu de xunetu cai tardíu y coincide col importante certame sidreru del conceyu vecín, lo que lleva a Bimenes a camudar la fecha habitual de celebración de la Fiesta de la Oficialidá pa nun coincidir con esti eventu. D’igual forma, pa nun perxudicar a otres fiestes de parroquies del conceyu, l’Ayuntamientu decidió treslladar de manera circunstancial la folixa cola que conmemora la declaración d’oficialidá del asturianu nel territoriu yerbatu a esti sábadu.

Ésta fíxose’l 5 de xunetu del 1997 baxu mandatu del alcalde Joaquín ‘Xuacu’ García Gutiérrez. Naquel tiempu l'asuntu llevóse a los tribunales y el Tribunal Superior de Xusticia d’Asturies (TSXA) torgóla un añu depués, al igual que la del restu de conceyos que siguieron el mesmu camín que Bimenes, con sentencia ratificada pol Tribunal Supremu al considerar los tribunales que los ayuntamientos nun tienen competencia pa ello, anque nel 2016, por iniciativa del primer edil actual Aitor García Corte, tornó a declarase oficial por unanimidá nel marcu de la propia Fiesta de la Oficialidá na so vixésima edición.

Xosé Antón González Riaño, presidente de l’Academia de la Llingua Asturiana, va encargase d’abrir la celebración del sábadu en Martimporra cola llectura del pregón na Casa Conceyu a les 12.30 hores, actu nel que tamién van tar presentes García Corte y l’alcalde de Miranda de l Douro. Darréu va facese la Danza de la Oficialidá y va comenzar un pasucais a cargu del Ensame de Música Tradicional Los Yerbatos y el grupu folclóricu del conceyu portugués.

La folixa va treslladase a les 14.30 hores al Palaciu del Marqués de Casa Estrada, onde va entamase una xira popular. La cita ta abierta a yerbatos y visitantes, anque si se quier tener sitiu dientro la carpa ye necesario llamar al númberu de teléfonu 985.70.00.04 o pasar pela Casa Conceyu, siendo’l miércoles el día caberu pa facelo.

Dende l’Ayuntamientu recuerden que la xente que prefiera dir al prau pue llevar la xinta de casa, pero que nun va tar permitío meter bébora al tar disponible un serviciu de chigre. Nel mesmu llugar van actuar Los Gascones a les 16.30 hores, que van repetir a les 20 hores, y a les 17.30 hores va celebrase’l XXV Campeonatu Oficial d’Escanciadores y V Concursu d’Escanciadores de Bimenes, puntuables pal Campeonatu d’Asturies.

A les 20.30 hores María Vázquez y Pau Santirso van poner un taller de danza ente los presentes pa preparase pal Bimenes en Danza previstu pa les 20.30 hores con Los Gascones, Herbamora y Cantaruxare, que va allargase hasta bien entrada la nueche. Otra manera, a lo llargo del día va instalase un mercáu agroalimentariu y artesanu.

Actividaes dende güei

Al igual que n’años anteriores, l’Ayuntamientu allarga la celebración de la oficialidá nel conceyu a tola selmana previa. Asina, esta mañana presentóse a les escolines y escolinos de Bimenes el poemariu ‘Versos d’Asturies’, de Daniel García Granda con ilustraciones d’Ilemi Cuesta.

El miércoles ta prevista una visita guiada n’asturianu a la Casa de los Radios. El percorríu per esta instalación de Suares va ser a les 18.30 hores, con entrada llibre.

La Selmana pola Oficialidá va completase’l vienres col I Campeonatu de Tute pola Oficialidá. Va comenzar a les 21.30 hores na carpa instalada nel Palaciu del Marqués de Casa Estrada y la inscripción por pareya ye de 20 euros, con premios pa los trés primeros clasificaos y los trés meyores de la repesca.

La xente interasao en participar ha de llamar al númberu de teléfonu 617.919.175. El chigre de la folixa va tener callos como platu especial pa la cena.

Contador Estadistiques