“Na Fiesta de la Oficialidá nun hai colores”, afirma García Corte

|
“Na Fiesta de la Oficialidá nun hai colores”, afirma García Corte

Alcaldes y representantes de dellos partíos, ente ellos el secretariu xeneral de la FSA, Adrián Barbón, acudieron a Bimenes pa participar na XXII Fiesta de la Oficialidá, onde “nun hai colores”, afirma l’alcalde Aitor García Corte. L’agua obligó a mover les actividaes al polideportivu del CP Martimporra, pero nun frenó la folixa.

“Al final la fiesta tuvo mui bien, la xente participó y vinieron munchos vecinos y xente de fuera, superando les 300 persones na xinta popular”, esplica’l primer edil, que se vio obligáu na tarde del vienres a tomar la decisión de treslladar tola infraestructura montada nel prau del Palaciu del Marqués de Casa Estrada a la instalación deportiva de la escuela llocal pol barru acumuláu tres l’agua cayida nes hores previes. Nel polideportivu tamién tuvo llugar l’actu institucional, onde destacó’l pregón de Xosé Antón González Riaño.

El presidente de l’Academia de la Llingua Asturiana repetió’l mesmu mensaxe que vien llanzando dende hai unos meses por cuenta de les desinformaciones d’un pequeñu sector con ecu nos medios y negó que la oficialidá del asturianu suponga “una imposición a la ciudadanía”. D’igual forma punxo a Bimenes, onde l’asturianu ye oficial dende l’añu 2016 –tamién se declaró nel 1997, orixe d’esta fiesta, pero’l TSXA torgólu tres un recursu de la Delegación del Gobiernu estatal n’Asturies–, como exemplu de consensu y afirmó’l que’l conceyu yerbatu “marca’l camín”.

La Fiesta de la Oficialidá contó, como vien siendo vezu, con una amplia representación institucional. Asina acudió a Bimenes un añu más Barbón, qu’enantes yá fora como alcalde de Llaviana y que tuvo acompañáu de la secretaria d’organización de la FSA, Gimena Llamedo, amás del diputáu d’IX Ovidio Zapico y el de Podemos Enrique López Hernández.

Xunto a tola corporación de Bimenes, tampoco nun se quixeron perder esta celebración tan simbólica los alcaldes d’El Valle Altu de Peñamellera, José Antonio Roque (Foro); Noreña, Amparo Antuña (Independientes por Noreña); Sariegu, Saúl Bastián (PROMUSA); Cabranes, Gerardo Fabián (PSOE); Colunga, Rogelio Pando (PSOE); Samartín del Rei Aurelio, Enrique Fernández Rodríguez (PSOE); Sobrescobiu, Marcelino Martínez Menéndez (PSOE); y Llaviana, Julio García (PSOE). Tamién hebo representación d’ediles de Casu, Nava, Villaviciosa y Siero, amás del empresariu militante de Foro Inaciu Iglesias.

Los representantes institucionales na XXII Fiesta de la Oficialidá escancien un culín.

Contador Estadistiques