“L’Academia pretende axuntar a tol sector de la creación audiovisual”, señala Fraga

Melania Fraga, Juan Tizón y Pablo A. Quiroga formen la primer xunta direutiva de l’Academia del Cine Asturiano, que pretende “axuntar a tol sector de la creación audiovisual”. L'asturianu y la muyer son dos prioridaes pa esta entidá que busca dignificar el cine del país.

La respuesta, de momento, ta siendo importante, con más de 60 persones inscrites hasta la fecha. “L’Academia del Cine Asturiano naz nun momentu nel qu’hai un interés ente los profesionales que nos dedicamos al tema cinematográficu en trabayar p’axuntar a tol sector de la creación audiovisual”, esplica Fraga.

El so orixe ta nes xornaes del Industry Days d'Asturies, entamaes pol Festival Internacional de Cine de Gijón (FICXixón) na pasada edición, nes que munchos profesionales manifestaron la torga que supón el tar desconectaos unos d'otros. D’ehí surdió la iniciativa de la realizadora Teresa Marcos de convocar a un grupu de cineastes pa reactivar l’Asociación de Realizadores y Directores Asturianos (ARDA), qu’avanzó darréu na idea de crear una entidá “más amplia entovía qu’incluyera tamién a actores, actrices, profesionales del maquillaxe, teúnicos, creativos…”.

Asina, el modelu más afayadizu ente tolos estudiaos foi’l de fundar una academia, un pasu que pronto algamó’l sofitu del sector, como amuesa que nel primer conceyu, celebráu’l 9 de febreru, participaren mediu centenar de persones. El vienres, na sala 3 de la Llaboral Ciudá de la Cultura, entamábase la primer Asamblea Xeneral de l’Academia del Cine Asturiano, con más de 60 inscritos, na que s’escoyó la xunta direutiva y s’afitaron les idees pa poner en marcha esti 2018.

Identificar y cohesionar

Ente les metes prioritaries d’esta entidá nesti primer añu ta “identificar a les persones que tán trabayando anguaño n’Asturies nel sector y cohesionar a los profesionales, amás de dignificar el cine asturiano, lo que vendrá solo si consiguimos los dos primeros oxetivos”, esplica Fraga. Asina, va ellaborase en primer llugar un informe sobre la situación del cine asturianu “pa saber que se ta faciendo n’Asturies” y, darréu, crear espacios d’alcuentru cola vista de buscar dicha cohesión ente les persones que conformen el sector audiovisual nel país.

Con estos primeros pasos l’Academia del Cine Asturiano pretende avanzar na superación de les problemátiques principales qu’atopen los profesionales n’Asturies. “El tratamientu de los medios de comunicación nun ye’l mesmu cuando nun festival se presenta una creación de casa o una de fuera”, rellata Fraga, que cree qu’otru déficit importante ye que “eses obres llariegues nun lleguen al públicu. Preséntense n’Asturies y tienen percorríu per fuera, pero non equí. Fai falta un circuitu de cine nel que se puedan ver estes creaciones”.

Por último, ta’l tema económicu, el cobrar por facer el to trabayu. “Hai xente que piensa que facer un curtiu ye facer dalgo colos collacios y non, ye una pieza cinematográfica que tien un llabor detrás”, apunta esti miembru de la xunta direutiva.

L’Academia del Cine Asturiano, tal y como s’afitó n’asamblea, tamién naz con otres dos prioridaes, “el tratamientu de la llingua asturiana y de la muyer”, espresa Fraga tres ser entrugada pol usu del idioma na entidá. Un compromisu que s’amuesa col fechu de que los “estatutos que se presentaron nel Rexistru tean escritos n’asturianu” y nel so usu normal na web y comunicaos.

Participación na SACO

Tres la celebración de l’Asamblea Xeneral y la puesta en marcha de les bases pa trabayar nel algame de los sos oxetivos, l’Academia va participar esti mes de mazru como convidada na Selmana del Audiovisual Contemporaneu d’Uviéu (SACO), en concreto nun alcuentru con direutores y productores del norte de Portugal.

Na imaxe Tizón, Fraga y Quiroga, primer xunta direutiva de l'Academia del Cine Asturiano. Semeya de María Cotiello/Academia del Cine Asturiano.