L'Academia del Cine Asturiano celebra les sos primeres xornaes

El xixonés Muséu del Ferrocarril acueye esti "espaciu esencial d'alcuentru pa toes aquelles personas interesaes en conocer y comprender el cine asturiano y a los sos profesionales".

L'Academia del Cine Asturiano, entidá nacida nel 2018, entama esta fin de selmana les so primeres Xornaes del Cine Asturiano. Va arrancar mañana a les 10.30 hores con una intervención de l'actual presidenta de la entidá, Graciela Mier, a la que va siguir la presentación del informe 'Polítiques d'impulsu del sector: L'audiovisual como reconversión industrial 4.0' a cargu del ex presidente Gonzalo Mañana.

Na mesa redonda 'Cine d'animación en remoto: D'Asturies al mundu', moderada por Fran Carrio, Javier Rodríguez, dibuxante de Marvel Comics y anguaño en DC Comics, y Luis Pelayo Junquera, director de The Angry Metal Company, con trabayos pa empreses como Netflix o Ubisoft, van esponer a les 11 hores cómo ye trabajar pa grandes multinacionales dende'l país. Darréu'l dramaturgu y guionista Maxi Rodríguez y el direutor Carlos Navarro van contar les anéudotes que dexa'l rodaxe de la so película 'Literato' na charra 'Filmar n'Asturies: Literato', que va presentar Alfonso S. Suárez dende les 12.15.

Va pesllar la mañana Pablo A. Quiroga a les 13.30 hores cola presentación de la I Muestra de Cine Escolar 'Esta escuela ye de cine' entamada xunto cola Oficina de Normalización Llingüística de Xixón. La tarde, mentes, va ser pa dos meses redondes: a les 16.30 hores, 'Del aula al plató', moderada por Tato Loché, na que Marcos Merino (Film LAB LaC6), Maribel Lugilde (CIFP CISLAN), Nacho Ortega (ESAD), Celia Cervera (Educación y Cine) y Miguel Ángel Montes (Asturias Film Commission) van esponer la realidá actual de la necesaria y urxente formación de profesionales, y, a les 17.45, 'Asturies, paraísu documental', cola participación de reconocíos cineastes del xéneru como Alejandro Nafría, Estela Cubilla, Daniel Lovi, Álex Galán y José F. Rivero, que van contar les sos esperiencies y debatir sobre'l documental cola moderación de Melania Fraga.

El domingu, namái pela mañana

Les xornaes van siguir na mañana del domingu. A les 10.30 hores va entamase otru alderique, nesta ocasión sobre'l 'Impactu y repercusión de festivales, televisión y ciclos de cine n'Asturies' conducida por Luis Pascual, presidente del Atenéu Obreru de Xixón, nel que van tener la pallabra Lucía Herrera (TPA), Alejandro Díaz Castaño (FICX), Griselda Coro (Puertas FilmFest), Sergio Valbuena (CortoGijón/FIVO), Ana Izarzugaza (MUSOC) y Javier Sampedro García (Ribadedeva en Corto). Iván Armesto, direutor audiovisual en Temps, responsable del procesu d'escoyeta de figuración y pequeñes partes pa películes y series dende va 15 años va poner darréu, a les 11.45 hores, la ponencia 'Actores y figurantes n'Asturies: Oportunidaes con llargues esperes', que va conducir Aure Roces.

Va poner el ramu, a les 13.30 hores, la conferencia 'Música de cine: La banda sonora como elementu constructivu de la hestoria', pol compositor Jorge Granda, que va presentar Mier. L'accesu a toles actividaes de les I Xornaes del Cine Asturiano son d'accesu llibre pal públicu.