L'Academia del Cine Asturiano participa en Zaragoza nun alcuentru d'academies ibériques

|
L'Academia del Cine Asturiano participa en Zaragoza nun alcuentru d'academies ibériques

La institución asturiana acude "coles mires d’establecer llazos y compartir esperiencies".

El II Alcuentru d'Academies de Cine d'España y Portugal ta celebrándose esti llunes en Zaragoza cola participación de les academies asturiana, andaluza, gallega, catalana, valenciana, española y portuguesa, amás de l'anfitriona, l'Academia del Cine Aragonés. Nel casu de l'Academia del Cine Asturiano desplazáronse hasta Aragón la vicepresidenta Marisa Vallejo y Graciela Mier.

Ayeri tuvo llugar la recepción de tolos desplazaos y esta mañana ta celebrándose'l Plenu d'Academies, siendo'l primer puntu del orde del día la presentación de les dos academies nueves, l'asturiana y la valenciana, que tien el nome d'Acadèmia Valenciana de l'Audiovisual. Nel mesmu tamién ta la redaición, aprobación y robla del conveniu de cooperación ente academies alcordáu nel primer alcuentu, que tuvo llugar en Galicia n'avientu del 2017, la puesta en común de proyeutos y un alderique de la situación del sector cinematográfico, ente otros.

"Vamos dir al alcuentru  coles mires d'establecer llazos y compartir esperiencies coles qu’arriquecer toles aiciones que ta faciendo esta cademia col fin d'ameyorar la creación cinematográfica n'Asturies", apunten dende l'Academia del Cine Asturiano.

Na semeya, Vallejo –primera pela izquierda– y Mier –segunda pela izquierda, na filera superior– xunto col restu de representantes de les restantes academies.

Contador Estadistiques