La estratexa nueva contra l'asturianu: xenerar conflictu asegurando nun entender l'idioma

María Esther García López sufrió protestes con esti argumentu nun alderique sobre la oficialidá celebráu n'Avilés.

El moderador da la pallabra a la escritora depués de la intervención de Diego Barceló, representante de la Plataforma contra la Cooficialidad. García López, convidada por la Sociedad Económica de Amigos del País de Avilés y Comarca xunto a Inaciu Iglesias pa defender una postura favorable a la igualdá de derechos de los falantes d'asturianu colos de castellanu n'Asturies, toma la pallabra y dende'l públicu entamen les protestes: "no se entiende" y "es una falta de respeto", dicen.

"Nesi momentu amenacié con llevantame y marchar. Namái nun lo fixi porque me lo pidió'l moderador y siguí usando l'asturianu, faltaría más", recuerda la de La Degoḷḷada. "El llugar taba enllenu. Recibí aplausos de parte del públicu y dalgún optó por marchar", añade.

"Foron media docena de persones que yá veníen cola perfomance preparada", apunta Iglesias, que, a pesar d'esti incidente "quedé mui contentu col alderique". "Agradezo a l'asociación que diera la oportunidá de debatir sobre esta cuestión, yá que pa muncha xente foi la primer oportunidá de sentir falar asturianu ellaborando un discursu", apunta l'empresariu, que tamién felicita a Francisco L. Jiménez, periodista de 'La Nueva España' encargáu de moderar l'actu entamáu en collaboración col diariu y la Universidá d'Uviéu, "pol so facer y imparcialidá".

"La pallabra pudo contra la intolerancia. La clave ta en falar dende la honestidá, ensin facer de menos al contrariu", sigue'l conseyeru delegáu de Cartonajes Vir, que destaca la satisfaición que vio nos presentes tres l'alderique.

Enfrente, defendiendo la postura contraria, taba, amás de Barceló, el profesor Celso Otero. "Emplegaron argumentos que daben risa", apunta García López, que recuerda'l deséu d'Otero de cambiar la Constitución o la so incapacidá p'aguantar una gaita más de 10 minutos mientres ella apelaba "a los derechos llingüísticos, l'artículu 3 de la Constitución, la escolarización, la cultura o'l trabayu de l'Academia na uniformidá de la llingua asturiana respetando les variantes".

La escritora, precisamente, tamién tuvo presente'l llunes nel otru actu onde dende los sectores contrarios a la oficialidá emplegaron l'idioma pa polemizar, el de conmemoración del Día de les Escritores. "Yo lleía depués de Marta Mori, y nun me enteré de que marchara la diputada", recuerda la valdesana, que llamenta que la so actitú "fixera que nun se falara de la verdadera intención del eventu", la reivindicación del llabor de les escritores a lo llargo de la historia.

Lo cierto ye que lo vivío ayeri n'Avilés y en situaciones anteriores dexen bien clara la estratexa nueva que dende estes posiciones s'emplega p'atacar al idioma: la busca de conflictu asegurando nun entender l'asturianu. Un argumentu ficticiu qu'emplegaran como comodín pa torgar, por exemplu, l'usu de la llingua asturiana na Xunta Xeneral.

Na semeya, Iglesias, García López, Jiménez, Otero y Barceló.