Asturianes presenten denuncies nueves pa la Querella Arxentina

La selmana pasada énte'l Consuláu del país sudamericanu en Lleón.

Dos denunciantes asturianes nueves van sumase a los casos procedentes d’Asturies que yá formen parte de la llamada Querella Arxentina (Querella 4591/10, del Xulgáu n.º 1 de Buenos Aires, que lleva alantre la maxistrada María Servini de Cubría por delitos de xenocidiu y lesa humanidá contra los responsables de la vulneración de los derechos humanos cuando’l franquismu). María Luz Fernández Álvarez y Rosario Alonso Suárez presentáronse la selmana pasada nel Consistoriu de San Marcelo énte’l Consuláu de la República Arxentina aprovechando la visita que fai per delles llocalidaes p’atender a los súbditos arxentinos que residen nel Estáu español pa presentar les denuncies, pa lo que tuvieron l'acompañamientu de Carme Prado, vocera de La Comuna d’Asturies, entidá asturiana que forma parte de la Coordinadora Estatatal d’Apoyu a la Querella Arxentina (CEAQUA).

Fernández Álvarez presentó’l so casu y el de la so familia (padre, madre y hermanu), que sufrieron prisión nos últimos años de la dictadura, ente'l 1974 y el 1977, acusaos de participar nel atentáu de la cai del Correo (Madrid). Famosa nos años setenta del sieglu pasáu pol movimientu de solidaridá que se creó n’Asturies col lema 'Mari Luz, n’Asturies faltes tu', sufrió inxustamente dos años y mediu de prisión preventiva –d’ellos, trés meses y mediu incomunicada–. Nunca foi xulgada nin, por supuesto, condenada. Solicita a la xueza arxentina que llibre un encamientu al xulgáu del so domiciliu en Mieres pa que pueda declarar nel marcu de la causa.

Alonso Suárez, pela so parte, denunció los casos de la so güela y el so padre, asesinaos nos años de la posguerra. A María Rosario Montes Estrada, d’El Prau Nuevu (Llaviana), embarazada d’ocho meses, detuviéronla en 1937, pegaron-y nel cuartel de Los Barreros y asesináronla en La Cuesta Vindoria con otros seis deteníos. El pá de Rosario, Erasmo Alonso Martinez, mineru en Los Barreros (Llaviana), foi deteníu pola Guardia Civil nel 1948, asesináu y tiráu a la sima del Pozu Funeres, nel mesmu conceyu. La so fía pide a la xueza arxentina que se desatierre El Pozu Funeres pa recuperar los restos d’Erasmo.