La Xira pola Oficialidá va facer homenaxe a los escritores maliayos na parada de Villaviciosa

Del llunes al vienres la Xira pola Oficialidá que ta percorriendo’l país pa concienciar sobre la necesidá del reconocimientu llegal de les llingües d'Asturies fai parada en Villaviciosa. La Fundación Almastur y Iniciativa pol Asturianu aprovechen la estancia nel conceyu pa recordar a los autores maliayos de los últimos sieglos y homenaxar a los actuales.

Depués de Bimenes, n’abril, y de Samartín del Rei Aurelio, el mes pasáu, Villaviciosa ye’l siguiente llugar n’acoyer les esposiciones y actividaes de la Xira pola Oficialidá, que s’adapten en parte a cada conceyu. La Casa los Hevia va ser la sede de les cuatro primeres xornades, con entamu’l llunes a les 19 hores cola inauguración insitucional y l’apertura de la esposición ‘Voces, una hestoria de la llingua asturiana’ y la de llibros básicos sobre l’asturianu qu’inclúi diccionarios, llibros de consulta y normativos, o traducciones al asturianu de grandes clásicos de la lliteratura, que se van poder visitar hasta’l vienres.

Darréu Inaciu Galán, vocal d’Iniciativa pol Asturianu y miembru de l'Academia de la Llingua Asturiana, va poner la charra-coloquiu ‘¿Por qué sí a la oficialidá del asturianu?’. El martes, siempre a les 19 hores, va proyeutase’l documental 'De güeles a nietes. El retu de la tresmisión xeneracional del asturianu’, a lo que va siguir un posterior alderique sobre la dificutá de la tresmisión xeneracional, y el miércoles va ser el momentu de conocer detalles sobre la toponimia del conceyu de la mano de Ramón d’Andrés.

El xueves y vienres, mentes, van tar destinaos a los escritores de Villaviciosa. Na primer xornada Miguel González Pereda, cronista oficial del conceyu y presidente del Atenéu Obreru de Villaviciosa, va poner la charra-coloquiu ‘Escritores de Maliayo. 4 sieglos escribiendo n’asturianu’, mentes que na segunda, na Casa de Caveda y Nava, va facese un homenaxe a los actuales.

Ésti va encuadrase nel pieslle oficial de la tercer parada de la Xira pola Oficialidá, que se va completar con una interpretación de gaita asturiana, un recital poéticu, la llectura del ‘Manifiestu pola Oficialidá’ y l’actuación, pa poner el ramu, de Mariluz Cristóbal. La Fundación Almastur y Iniciativa pol Asturianu animen a los centros educativos, asociaciones culturales, movimientu vecinal y entidaes xuveniles del conceyu a participar, pol so interés, nes actividaes programaes y treslladen el so agradecimientu al Conceyu de Villaviciosa, “n’especial al alcalde, Alejandro Vega, y a la conceyala de Cultura, Rocío Vega, pol sofitu y collaboración p’acoyer la Xira pola Oficialidá”.

Na semeya, un momentu del reconocimientu celebráu en Sotrondio a los primeros docentes de la materia de Llingua Asturiana y Lliteratura na incorporación de l'asignatura a la escuela nel 1984 nunos pocos centros pilotu.