La Wikipedia n’asturianu va tar representada en Sudáfrica na convención añal de la Wikimedia Foundation

Víctor Suárez va participar per segundu añu siguíu na convención añal de la Wikimedia Foundation, que nesta ocasión tien como sede la población sudafricana de Cape Town. Al igual que fixo en Montreal, l'usuariu y alministrador va participar en dellos grupos de trabayu pa visibilizar l’idioma y la Wikipedia n’asturianu.

Wikimania 2018, nome del eventu, va celebrase ente’l miércoles y el domingu, pero yá dende güei van celebrese ‘preconferencies’. Alministradores y usuarios de Wikipedia de tol mundu axúntense p’aldericar y compartir esperiencies al traviés de ponencies y dellos grupos de trabayu nuna cita qu’esti añu ta centrada na diversidá, d’ehí que s’escoyera África, y en concreto Sudáfrica, pal so entamu.

Wikipedia n’asturianu torna a tar representada nesta convención añal depués de que Suárez recibiera una de les beques que da la Wikimedia Foundation pa facilitar l’asistencia a persones venceyaes col proyeutu. La so presencia va servir pa potenciar un grupu de trabayu sobre llingües minorizaes de tol mundu qu’entamara en Montreal xunto con compañeros de la Wikipedia n’eusquera y qu’esti añu pretende contar con más asistentes.

D’igual forma, ente los planes de Suárez tamién ta estrechar llazos con Wikipedia Colombia, que va desplazar hasta Sudáfrica, ente otros, a Juan Sebastián Quintero, un bon falante d’asturianu pese a nun tener venceyu nengún con Asturies. La idea ye poner en marcha un proyetu común qu’axunte a la emigración.

Artículu 80.000 mientres l’eventu

“Tolo que se fai ye pa visibilizar la llingua asturiana; que se sepa qu’esiste y que ta n’igualdá de condiciones col restu de les llingües”, esplica Suárez, que considera tamién mui positivo pal desendolcu de la Wikipedia n’asturianu “el poder conocer la situación d’otros idiomes”. Como anécdota rellata que “siempre se nos diz que l’asturianu ye una llingua pa tar en casa, pero tamién val pa tar en Sudáfrica. Inclusive, la cuenta oficial del eventu respondió n’inglés a un tweet escritru n’asturianu. La nuesa llingua val como otra llingua más”.

La presencia de Suárez en Cape Town va coincidir tamién cola creación del artículu númberu 80.000 de la Wikipedia n’asturianu. Siguiendo la llinia marcada pola comunidá asturiana de consiguir finar cola fienda de xéneru na enciclopedia llibre, ésti va tar dedicáu a un científica sudafricana.