Suárez: “Ye fundamental que l’asturianu tea en Wikipedia, la principal puerta d’accesu al conocimientu n’Internet”

Trece años de trabayu y más de 50.000 artículos ye la carta de presentación de Wikipedia n'asturianu, comunidá formada por voluntarios que permite que l'idioma tea asitiáu al mesmu nivel qu’otros de más falantes na enciclopedia llibre. El maestru d’asturianu Víctor Suárez Piñero (Uviéu, 1988) ye’l so alministrador dende’l 2006.

En xunetu Wikipedia n’asturianu superaba los 50.000 artículos. ¿Qué supón esta cifra pa una llingua como l’asturianu?

Cuido que toos somos conscientes de la difícil situación que vive’l nuestru idioma y de lo importante que ye ganar espacios de visibilidá pal mesmu. Nesti casu, trátase d’una cifra que nun dexa de ser simbólica pero que supón dar un pasu más y afitar un proyeutu que yá lleva trece años funcionando de manera ininterrumpida y asitiando l’asturianu a nivel global. Nel ámbitu llocal sirviónos pa venos les cares y celebralo en Bimenes con xente de les versiones n’español, catalán, gallegu y eusquera. Foi una esperiencia prestosa y de la que toos deprendimos muncho. Supunxo tamién el compromisu más importante hasta la fecha per parte de les instituciones porque contamos en tou momentu cola collaboración del Conceyu de Bimenes y d’Aitor García, el so alcalde, que se desvivió pa que too saliera p’alantre, y cola asistencia de Xose Antón González Riaño, como presidente de l’Academia de la Llingua Asturiana, y de Fernando Padilla Palicio, como direutor xeneral de Planificación Llingüística y Normalización.

Per otru llau, paezme qu’esti númberu d’artículos con temátiques tan estremaes ye una forma inédita d’emplegar l’asturianu pa estayes nes qu’hasta agora nun tuvo muncha presencia, como ye por exemplu l’ámbitu científicu o téunicu. Sicasí, queda muncho por ameyorar y vamos siguir faciéndolo na midida de lo posible.

Y a lo último, tamién ye dalgo propio y a destacar el tipu d’accesibilidá y distribución del conteníu. Apostamos pola cultura llibre frente a les llicencies restrictives que munches veces son contraproducentes. Nun tien munchu sentíu invertir dineru públicu en crear material y publicaciones que dempués queden nun caxón o que nin siquiera tán dixitalizaos pa poder consultales. Nesi sentíu, con toles crítiques que se pueda facer a Wikipedia, creo que vamos per delantre no qu’habría ser la promoción de la nuestra llingua na rede.

Pa esi númberu tan significáu escoyeron la entrada ‘Derechos Humanos en materia llingüística’.

Sí, normalmente nun suel escoyese un artículu determináu pa les cifres redondes, pero nesti casu al tratase d’una cifra tan significativa y que pensamos que podía tener dalguna sonadía ficimos qu’esi artículu fuera’l númberu 50.000 pa recordar que l’asturianu, amás d’un patrimoniu, tamién ye una fonte de derechos pa los y les falantes.

¿En qué posición s’atopa agora l’asturianu na llista d’idiomes por artículos?

Güei tamos nel puestu 78 d’una llista de 300 llingües y, anque nun ye un concursu nin estes cifres son lo más importante, tamos arguyosos del nuestru trabayu que mos pon a l’altura d’idiomes con munchos más falantes y, inclusive, penriba d’otros como l’islandés o’l gaélicu irlandés.

Tol trabayu que desendolca Wikipedia n’asturianu ye voluntario. ¿Cómo s’organicen?

Munches veces cuando faigo charres divulgatives o talleres d’edición la xente nun lo cree, pero sí, tol trabayu d’edición que se fai na Wikipedia n’asturianu ye voluntariu y ta disponible pal so usu de manera gratuita. Ye dalgo que, per un llau, permite caltener la neutralidá pero, d’otra miente, echa p’atrás a una montonera xente pola cantidá d’hores que supón y la poca ‘recompensa’ que tien.

Sobre la manera d’organizanos..., va por temporaes. Al ser una actividá voluntaria tampoco tenemos nenguna obligación, polo que munches veces el llabor faise en función de los gustos personales de caún. Sicasí, un pequeñu grupu d’alministradores más activos sí que nos coordinamos a la hora de crear artículos que se consideren necesarios en toles Wikipedies o dalgunos d’actualidá. Per otru llau, ye importante destacar que procuramos facer un proyeutu global y non una enciclopedia asturiana, polo que la temática d’artículos ye mui amplia y munches veces perpasa la nuestra capacidá. Y ehí podríemos facer dalgo d’autocrítica porque nesi enfotu por facer un proyeutu global, fáltanos munchu conteníu llocal qu’habría de tar na enciclopedia cuantayá.

¿Qué rellación tienen con otros coleutivos que trabayen en Wikipedia n’otres llingües minorizaes?

Unu de los fallos que creo que cometimos foi nun nos organizar de dalguna manera a nivel llocal, hasta’l puntu de nun conocer en persona a dellos usuarios que son mui activos. Eso ye un error porque los proyeutos hai qu’humanizalos y dende va unos pocos años vengo faciendo un esfuerzu por rellacioname con grupos de trabayu de tol Estáu. A finales de 2013 viaxé a Barcelona p’asistir a una actividá d’Amical Wikimedia, l’asociación temática que trabaya con Viquipèdia y los sos proyeutos hermanos en catalán, y pa min supunxo un puntu d’inflexón. Ver la so manera de trabayar animóme a querer amosar que n’asturianu tamién tábemos faciendo coses y a convenceme que yera preciso asociame, polo que nel 2014 fícime miembru de Wikimedia España, que ye’l capítulu oficial de la Fundación nel Estáu español y qu’emplega con normalidá toles llingües del mesmu. Dende entós p’acá pudi conocer a miembros de la Wikipedia en gallegu o al Grupu d’usuarios vascos, y venceyanos en proyeutos qu’espero que dean resultaos bien pronto.  

L’agostu pasáu vusté tuvo la oportunidá de viaxar a Montreal pa participar na convención añal de la Wikimedia Foundation tres recibir una de les sos beques. ¿Qué tal foi la esperiencia?

La verdá que, como yá dixi anteriormente, na comunidá d’usuarios asturianos cometimos l’error de ‘vivir al marxe’ de lo que se taba faciendo en tol mundu y creo que la presencia d’un usuariu n’asturianu nestos eventos hebo de dase primero. Sicasí, nunca ye tarde y la esperiencia nun pudo ser más positiva, non sólo nel planu personal.

En declaraciones a Asturies.com señaló que la so intención en Canadá yera “visibilizar la situación de la llingua asturiana y de la propia Wikipedia n’asturianu”. ¿Algamó l’oxetivu?

A lo menos intentóse. Si la situación ye desconocida na nuestra redolada ye d’imaxinar cuálu ye’l grau de conocimientu en Norteamérica. Sicasí, l’ambiente ye favoratible dafechu a la diversidá llingüísticu y hai munchu interés por conocer el trabayu de los proyeutos en llingües minorizaes. D’esta manera, a nivel individual pudi charrar con usuarios d’Azerbaixán, Inglaterra, Gales, Estaos Xuníos, Noruega, Ucraína..., amás de países d’América Llatina.

Per otru llau, pudi tamién collaborar col proyeutu d’un usuariu neoyorquín que quier consiguir grabar toles llingües del mundu o participar na creación d’un grupu de coordinación pa llingües como la nuestra en proyeutos wiki.

¿Había conocimientu sobre la situación del asturianu ente’l restu de paticipantes?

El mayor grau de conocimientu de la diversidá llingüística del Estáu dase nos países d’América Llatina. Con too, la situación del asturianu ye bien desconocida.

¿Qué supón Wikipedia como ferramienta?

Fundamentalmente una forma de defender el conocimientu llibre intentando que tol conocimientu global tea n’asturianu y que tol conocimientu creáu orixinalmente n’asturianu pueda tar en toles llingües, n’Internet, llibre y de baldre.

¿Por qué ye importante que l’asturianu tea presencia nesta enciclopedia llibre?

Agora mesmo Wikipedia allúgase nel puestu 5 ente les webs más visitaes del mundu y ye la principal puerta d’accesu al conocimientu n’Internet. Ye fundamental que tea ehí y pa garantizar que siga tándolo nun futuru ye indispensable que s’involucren les instituciones asturianes.

¿Ayudó a visibilizar el so llabor el Premiu Princesa de Asturias de Cooperación Internacional del 2015?

Independientemente de lo que podamos pensar a títulu individual d’esos premios, la verdá ye que sí qu’ayudaron a da-y ‘seriedá’ a la enciclopedia. Hasta que nun s’entregó esi premiu y se convidó al fundador Jimmy Walles a la Xunta Xeneral, qu’emponderó’l trabayu de la Wikipedia n’asturianu (depués trescritu como bable, nes actes), naide nun mirara pa nós. Ye esi complexu tan asturianu pol que tien que venir daquién de fuera a valorar que tienes.

Dende la comunidá de Wikipedia n’asturianu entamen cada poco wikialcuentros o otru tipu d’activides, la última con escolinos y escolines nel Día de les Ciencies Asturianes de la mano de la Direición Xeneral de Planificación Llingüística y Normalización.

Non tantes como me gustaría, pero sí, dende’l 2014 venimos faciendo dellos talleres d’edición p’averar l’usu de la enciclopedia a tou tipu de públicos nos conceyos. Ye bien importante que la xente pierda’l mieu a editar y a crear conteníu, polo qu’estes actividaes de divulgación ayuden a ganar usuarios y munches veces a que sepan qu’esiste una versión n’asturianu. A raíz de talleres que punxi en Xixón, Uviéu, Samartín del Rei Aurelio o Bimenes, delles persones decidiéronse a collaborar y ye mui d’agradecer.

La última actividá foi una iniciativa de Planificación Llingüística y Normalización y agradezo fondamente que contaren conmigo pa llevala alantre. Con motivu del Día de les Ciencies Asturianes, el 10 de payares, entamáronse dos charres divulgatives col títulu ‘Wikipedia: Un universu d’oportunidaes’ nel CP El Vallín y nel IES Isla de la Deva, de Piedrasblancas. Foi una esperiencia qu’habría de repetise y que podía complementase con proyeutos más a llargu plazu como vienen faciendo en Cataluña o País Vascu.

¿Qué pue facer una persona que llea esta entrevista pa collaborar col proyeutu?

La Wikipedia ye de toos y toes, polo que si hai dalgún error o dalgo que falta tamién ye una responsabilidá coleutiva. Cuantes más persones se sumen meyor, pero ye verdá que ye bien difícil animar a la xente a que collabore. Sicasí, si daquién quier facelo nun tien más que dirixise a https://ast.wikipedia.org, buscar dalgún tema del so interés y calcar n’editar. Nun fai falta rexistrase y hai un grupu de persones detrás pa resolver cualesquier dulda.