Asturies va volver a entamar el miércoles cola vacunación con AstraZeneca

El xueves rexistráronse 136 contaxos, con una tasa de positividá diaria del 6,29 por cientu. Ḷḷena sal del riesgu estremu y el domingu abre la movilidá y los interiores de los chigres.

El Comité de Farmacovixilancia de l’Axencia Europea del Medicamentu concluyó ayeri, tres analizar los casos inusuales de trombosis venosa cerebral que se dieron en persones que recibieren la vacuna d'AstraZeneca, "que nun se pue probar rellación causal ente la vacuna y estos eventos, anque reconocen que tampoco se pue descartar esta rellación", esplicó'l conseyeru de Salú, Pablo Ignacio Fernández Muñiz. Poro, entiéndese que'l "balance beneficiu-riesgu" ye positiva y el miércoles Asturies va remotar la so puesta tres la decisión tomada ayeri por unanimidá pol Conseyu Interterritorial del Sistema Nacional de Salud convocáu de manera estraordinaria.

Nel país alministráronse hasta'l momentu 10.063 dosis d'AstraZeneca, ensin nengún casu confirmáu de trombos, anque se ta estudiando la muerte d'una muyer de 40 años del oriente una selmana depués de recibila. Salú nun ve rellación nesti casu.

Sigue la meseta

Asturies, con más del 96 por cientu de casos de la variante inglesa, sigue ensin consiguir baxar la incidencia, qu'acumula trés díes en 172 casos cada 100.000 habitantes nos 14 díes últimos –cola actualización baxo a 170–. A falta de conocer los datos oficiales de la COVID-19, la Conseyería de Salú adelantó qu'ayeri se detectaron 136 contaxos, 6 más que'l miércoles.

El Serviciu de Salú del Principáu d'Asturies (SESPA) fixo 2.782 pruebes de diagnósticu d'infeición activa, polo que la tasa de positividá asitióse nel 6,29 por cientu, cuando'l día anterior quedó nun 5,31 por cientu. A 7 díes nesa xornada esti porcentaxe yera del 5,56 por cientu –ayeri xubió a 5,66 por cientu–, en tendencia ascendente.

Hai que llamentar una muerte, la d'un home de 76 años. Dende qu'entamó l'andanciu perdieron la vida cola enfermedá causada pol coronavirus SARS-CoV-2 un total de 1.831 persones.

Tán hospitalizaos 209 pacientes hospitalizados con confirmación o sospecha de COVID-19, 8 menos que'l miércoles. Mentes, la UCI sigue con 88 ingresaos.

3 conceyos en 4+

Un día depués de que s'active'l zarru perimetral en Siero, ésti va llevantase en Ḷḷena. El conceyu, dende'l 26 de xineru en riesgu estremu, consigue por fin salir, polo que recupera'l domingu la movilidá y torna a les midíes comunes al conxuntu del país.

Tán en nivel d'alerta 4+ Piloña y Cangues d'Onís, y mañana Siero. Pa consultar la situación de tolos llugares y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, Fernández Muñiz esta mañana en Cabueñes, onde visitó la primer unidá de Patoloxía Séptica y Ciruxía Reconstructiva Ostearticular del país.