La UABRA repite’l formatu virtual na edición del 2022

Tampoco nun va haber clases presenciales na Universidá Asturiana de Branu (UABRA) d’esti añu. La duodécima edición d’esta iniciativa entamada pola Academia de la Llingua Asturiana (ALLA) y la Universidá d’Uviéu va desendolcase en llinia, al igual que l’añu pasáu, nes dos selmanes últimes de xunetu cola ufierta habitual.

El ‘Cursu Elemental de Llingua Asturiana’ y el ‘Cursu Avanzáu de Llingua Asturiana’ van ponese del 18 al 29 del séptimu mes del añu pa sumar un total de 50 hores llectives. Con 25 y 35 places disponibles, de manera respeutiva, y un costu de 160 euros, son los dos clásicos de los cursos de l’ALLA y cuenten cola direición académica de Gonzalo Llameda, col sofitu de Roberto Avello, y Margarita Fernández Mier.

Amás convóquense dos cursos d’Afondamientu Cultura y Llingüísticu, ‘Capacitación pa la traducción al asturianu’, que repite, y ‘Fundamentos d’Internet’. Entrambos va desendolcase na primer selmana, del 18 al 22 de xunetu, baxo la xestión de María del Carmen Muñiz Cachón y David Melendi, de manera respeutiva, y tienen un preciu de 80 euros y 26,5 hores llectives.

L’ALLA opta un añu más por una edición en llinia de la UABRA pola pandemia de COVID-19. La última edición en Cangas del Narcea foi nel 2019, yá que nel 2020 nun se celebró y l’añu pasáu optóse por un formatu virtual que se repite.

Capacitación docente d’Eonaviego

El 4 de xuntu va entamase la prueba d’accesu al ‘Curso de Capacitación en Eonaviego ou Gallego-Asturiano’ na so primer fase, que va tener llugar, nesti casu de manera presencia, del 1 al 5 y del 8 al 12 d’agostu nel Complexo Cultural As Quintas da Caridá. Les clases van ser n’horariu de mañana y tarde, de 9.30 a 2 y de 17 a 19 hores, y tienen un preciu de 160 euros.

L’esame pa poder acceder al cursu, destináu a persones con capacitación oficial pa exercer docencia, va desendolcase a les 10.30 hores nel IES Marqués de Casariego de Tapia. La inscripción pue facese hasta’l día 2 previo pagu de 20 euros.

Na semeya, Escuela-Hogar de Cangas onde venía celebrándose la UABRA hasta la pandemia de COVID-19.