La UABRA torna esti añu con un formatu en llinia

Nun va ser en Cangas del Narcea de forma presencial, pero la Universidá Asturiana de Branu (UABRA) torna esti añu. La situación sanitaria pola pandemia de COVID-19 lleva a l’Academia de la Llingua Asturiana (ALLA) a celebrar en llinia la undécima edición.

La celebración del ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, asina como los d’Afondamientu Cultural y Llingüísticu, adelántase al 19 de xunetu con una mesma duración. Asina van ponese hasta’l día 30, con 50 hores llectives, 10 menos de lo habitual, y con un preciu de matrícula de 160 euros.

L’ALLA convoca esti añu dos cursos d’Afondamientu Cultura y Llingüísticu, ‘Seguranza n’Internet’ y ‘Capacitación pa la traducción al asturianu’, que se van desendolcar del 19 al 24 de xunetu con un preciu de 80 euros y 26,5 hores llectives. El primeru ta dirixíu por David Melendi y va contar cola participación como profesores de Fernando de la Fuente y David Guardado, cofundadores d’Asturies.com, mentes que'l segundu tien al frente a Cristina Valdés, direutora de la UABRA, que va tener el sofitu d'Héctor García Gil, Xaime Martínez y Pablo Barrio.

La matrícula va abrise’l xueves y va tener que formalizase al traviés de la web de la Universidá d’Uviéu, institución que collabora cola ALLA nel entamu de la UABRA dende la so creacion. Amás reconoz creitos ECTS nos más de los cursos.

Gallego-asturiano

Completa la ufierta de la UABRA’l ‘Curso de Gallego-asturiano’, que va tener llugar del 2 al 7 d’agostu na Casa das Quintas da Caridá gracies al sofitu del Conceyo del Franco. Esti añu va ponese la segunda fase de les trés de les que se compón el Programa de Capacitación en Gallego-asturiano pra Profesores, titulación esixida pa dar la materia en Primaria y Secundaria.