“La intención ye volver a la presencialidá na UABRA”, anuncia Valdés

Esti llunes arrancaron los trés cursos en llinia que se ponen esti añu na Universidá Asturiana de Branu (UABRA) de l’Academia de la Llingua Asturiana (ALLA). Más de mediu centenar de persones participen na decimosegunda edición d’esta iniciativa qu’espera tornar a ser “esi espaciu d’inmersión llingüística y cultural” l’añu qu’entra.

“Paeciónos prudente esperar esti añu; nun ta la situación pa xuntar a ciento y pico persones en Cangas. La intención ye volver a la presencialidá”, aseguró María Cristina Valdés, direutora de la UABRA, qu’en setiembre cuenta con aconceyar col Conceyu de Cangas del Narcea pa entamar a preparar la edición próxima. “Queremos da-y una vuelta. Hai que ver cómo tán les instalaciones”, esplica al tiempu que confirma que la primer idea ye siguir na población qu’acompaña a esta iniciativa na que tamién participa la Universidá d’Uviéu.

Los tradicionales ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, de dos selmanes de llargor, y ún de los dos d’Afondamientu Cultura y Llingüísticu, el de ‘Capacitación pa la traducción al asturianu’, que s’allarga hasta’l vienres, arrancaron esta mañana con unos venti alumnos en caún d’ellos. Cayó finalmente’l de ‘Fundamentos d’Internet’, al igual que l’añu pasáu, “por ser un cursu más atractivu de manera presencial por mor de los conteníos que se dan”, apuntó Valdés, magar qu’esti añu la UABRA trató d’adaptalu meyor a les clases en llinia.

Una xornada inaugural na que nun faltaron dalgunos fallos téunicos habituales nel primer día, pero nos que yá se trabaya pa solucionalos. Entrugada por si cambien muncho les clases d’un formatu presencia a otru en llinia, la direutora respuende que “munchísimo” y recuerda que “la idea de la UABRA ye la convivencia y usar la llingua nun contestu asturfalante”.

Sicasí, tamién tien coses positives, como la posibilidá de participación de xente de fuera, con presencia l’añu pasáu d’alumnos dende Estaos Xuníos y otros países. Por esti motivu, y dao que l’espíritu de la UABRA ye’l ser un “espaciu d’inmersión llingüística y cultural”, l’añu qu’entra tornará la presencialidá ensin que se refugue la posibilidá d’ufiertar a les persones que nun puedan tar físicamente nes clases que faigan el cursu en llinia.

Depués de doce ediciones, Valdés considera que l’oxetivu col que nació la UABRA “cumplióse con creces, superóse”, lo que nun quita pa “avanzar y tratar de desarrollala d’otra manera” cola intención d’asemeyase a los cursos de branu “de la Menéndez Pelayo y la Complutense, n’Asturies y n’asturianu”. La salida de la situación esceicional pola pandemia va ser una bona oportundá pa ello.

El de gallego-asturiano, presencial n’A Caridá

El ‘Curso de Capacitación en Eonaviego ou Gallego-Asturiano’, que tamién forma parte de la programación habitual de la UABRA, va desendolcase, na so primer fase, del 1 al 5 y del 8 al 12 d’agostu nel Complexo Cultural As Quintas da Caridá. Ésta sí va ser de calter presencial y va acompañase de dos charres abiertes al públicu: ‘Condicionamentos y valías paisaxísticas del Navia-Eo’, a cargu de Benxamín Méndez, el día 3, y ‘Prantiamento metodolóxico y primeiros resultaos da comisión lexicográfica del diccionario normativo d'eonaviego’, por Carmen Siñeriz y Natalia Riego, el 10.

Na imaxe, entrada a la plataforma d'Internet na que siguir ‘Cursu Elemental de Llingua Asturiana’.