La tasa de positividá raspia'l 7 por cientu

Detectáronse 291 casos nuevos nuna xornada na que perdieron la vida 8 persones.

A falta de conocer los datos oficiales de la COVID-19, Asturies rexistró ayeri 291 contaxos. Son 46 más que'l llunes.

Na xornada fixéronse 4.216 pruebes PCR, polo que la tasa de positividá asitióse nel 6,9 por cientu, inferior a la del día anterior, cuando foi del 7,73 por cientu. Ésta sigue siendo superior al 5 por cientu que marca la Organización Mundial de la Salú (OMS) como llende pa tener controlada la pandemia.

Hai que llamentar esti martes la muerte de 8 persones, cuatro muyeres de 95, 91, 82 y 80 años y cuatro homes de 91, 80, 77 y 59. Dende que principió l'andanciu finaron con COVID-19 un total de 498 persones.

No que respeuta a les hospitalizaciones, la Conseyería de Salú informa d'un total de 690 pacientes COVID-19 ente confirmaos y sospechosos, a los qu'hai que sumar 108 ingresaes na UCI.

16 biltos en residencies

Ente'l 27 d'ochobre y el 2 de payares rexistráronse 16 biltos de coronavirus en residencies de persones mayores. En total contabilícense 376 positivos nuevos ente residentes y trabayadores.

Les autoridaes sanitaries intervienen cuando se detecta un primer contaxu, anque se cuenten como biltos cuando hai al menos trés. Nesi sen, nesi periodu confirmaróse casos n'otros 24 centros residenciales.