Asturies vive la xornada más prieta de la pandemia: 22 finaos

Esti miércoles detectáronse 429 casos nuevos de COVID-19, con una tasa de positividá del 8,9 por cientu. El país tien 33 biltos activos.

La Conseyería de Salú comunicó que na xornada d'ayeri 22 persones perdieron la vida cola enfermedá causada pol coronavirus SARS-CoV-2. Son once muyeres de 95, 94, 93, 89, 88, 88, 87, 87, 86, 86 y 82 años y once homes de 95, 93, 92, 88, 88, 87, 86, 75, 72, 65 y 63, de los que doce vivíen en residencies.

Estes 22 muertes signifiquen la cifra más alta de tola pandemia, superando los 18 del llunes y los 13 del 17 d'abril, na primer fola. Un total de 520 persones finaron nel país hasta la fecha con COVID-19.

A falta de conocer los datos oficiales, ayeri rexistráronse 429 contaxos, 138 más que'l martes. Fixéronse 4.799 pruebes PCR, polo que la tasa de positividá asitióse nel 8,9 por cientu, pol 6,9 por cientu de la xornada anterior.

No que respeuta a les hospitalizaciones, Salú informa de la esistencia de 661 pacientes ingresaos con confirmación o sospecha de COVID-19, con otres 115 persones na UCI. El martes había 690 y 108, de manera respeutiva.

Dos focos más

Asturies treslladó al Ministeriu de Sanidá 16 biltos nuevos, tando anguaño activos un total de 33 venceyaos colos ámbitos sociosanitario, llaboral, educativo y de relación social, sobre manera hostelería y ximnasios. Son dos más qu'hai 7 díes, cuando había 31.