Aumenta puntu y mediu la positividá esti llunes

Rexistrásonse 245 casos nuevos de COVID-19 con una tasa del 7,73 por cientu y 18 muertes, la cifra más alta de tola pandemia.

Tres el récor de contaxos del xueves, con 435 positivos y una positividá del 8,89 por cientu, na ponte festiva por Difuntos acumuláronse cifres dalgo meyores: el vienres, 400 con 8,1 por cientu; el sábadu, 282 con 6,15 por cientu; el domingu, 194 con 6,19 por cientu; y ayeri, 245 –250 según los datos oficiales tres sumar 5 diagnosticaos en díes previos–con 7,73 por cientu. Na xornada última fixéronse 3.165 PCR.

Nesti día hai que llamentar la muerte de 18 persones, acumulando dos díes mui prietos, yá que'l domingu foron 11, que fora tamién la cifra más alta de la segunda fola. El tope hasta agora yera de 13, correspondiente al 17 d'abril.

Les persones finaes son once muyeres de 98, 96, 93, 90, 87, 86, 84, 81, 79, 76 y 59 años, y siete homes de 92, 85, 84, 84, 71, 62 y 57. Seis d'ellos vivíen en centros residenciales de mayores.

Mentes, la Conseyería de Salú informa de la esistencia de 647 pacientes COVID hospitalizaos ente confirmaos y sospechosos, con 86 ingresos ayeri. Amás, otres 107 persones tán na UCI tres rexistrase 10 pacientes más na xornada última.

Mensaxe pa los mayores de 65 años

Les autoridaes sanitaries encamienten a les persones mayores de 65 años o con patoloxíes previes qu'usen la mázcara tamién nos alcuentros familiares y qu'aumenten les midíes de proteición dada la alta incidencia del coronavirus SARS-CoV-2 nesta franxa d'edá.