La selmana última rexistróse una media de 2.355 contaxos diarios

El vienres superóse otra vegada'l récor de la pandemia, con 2.760 casos nuevos. Les hospitalizaciones ascienden a 427.

L'ascensu de contaxos cola llegada de la variante ómicron coronavirus SARS-CoV-2 sigue la tendencia ascendente. Si la selmana d'Añu Nuevu se detectaron 13.333 positivos –13.513 llueu d'una revisión–, na pasada, la de Reis, comunicáronse 16.482.

Supón una media diaria de 2.355 contaxos, cifra más alta de la pandemia, superando los 1.905 de la selmana anterior. Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032 y 1.905, hasta los 2.355 actuales.

Nesta fin de selmana la Conseyería de Salú detectó 7.588 positivos: 2.760 el vienres –récor del andanciu al sobrepasar los 2.707 del miércoles–, 2.609 el sábadu y 2.219 d'ayeri. Estes xornaes perdieron la vida 12 persones con COVID-19 con edaes comprendíes ente los 59 y 99 años.

Los ingresaos con esta enfermedá pasaron de 376 a 427 dende'l xueves, de los que 367 tán en planta, 46 más, y 60 na UCI, 5 más. La ocupación total por esta patoloxía ye del 12,23 y del 19,80 por cientu, de manera respeutiva.

Na semeya, puntu de vacunación nel aparcamientu del Mercáu Nacional de Ganáu de La Pola Siero la selmana pasada.