El miércoles superóse per segundu día la cifra más alta de casos nuevos de COVID-19 de tol andanciu

Detectáronse 2.707, mentes qu'en Reis la cantidá baxó a 2.095. Hebo que llamentar seis muertes cola enfermedá nestes dos xornaes.

Nun apara la medría de casos nuevos de COVID-19. Magar les cinco xornaes de baxada que s'enllazaron ente'l xueves pasáu y el llunes, el martes rexistróse la cifra más alta del andanciu, con 2.342 positivos, y el miércoles tornó a superase esta cantidá.

En total, estos dos díes últimos la Conseyería de Salú comunicó 4.802 casos, 2.707 el miércoles y 2.095 ayeri, xornada festiva. El total no que va d'andanciu xube hasta 113.020.

Les hospitalizaciones tamién vivieron una aumentu al pasar de 337 a 376. Hai 321 persones ingresaes en planta, 37 más que'l martes, y 55 na UCI, 2 más.

La ocupación total por esta patoloxía nos hospitales ta nel 10,84 y nel 18,15 por cientu, de manera respeutiva. Otra manera, finaron estos díes 6 persones, polo qu'aumenta'l total de muertes a 2.186 –incorporóse a la serie del llunes non contabilizada nel so momentu–: 3 homes de 79, 73 y 69 años el miércoles y dos de 69 y 53, y una muyer de 87, ayeri.

Na semeya, toma de muestra a una moza nel puntu móvil pa facer test d'antíxenos instaláu en Xixón, nel barriu de La Calzada.