Asturies supera la cifra de 100.000 positivos confirmaos nel andanciu

Nes dos selmanes últimes rexistráronse 1.033 y 1.905 contaxos diarios de media.

No que va d'andanciu Asturies acumula 104.005 casos de COVID-19 confirmaos dende'l 29 de febreru del 2020, fecha na que se comunicó'l primeru. Estos cuatro díes últimos detectáronse 7.967: 2.055 el xueves, 2.029 el vienres, 1.965 el sábadu y 1.918 ayeri.

La llegada de la variante ómicron del coronavirus SARS-CoV-2 al país, colos 9 primeros contaxos ratificaos el 16 d'avientu, provocó un gran aumentu de los casos. Asina, na selmana del 20 al 26 hebo una media de 1.032 positivos diarios, que la pasada medró hasta los 1.905, les cifres más altes de tola pandemia.

Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632 y 1.032, hasta los 1.905 actuales.

Crecimientu moderáu de la presión hospitalaria

Esti ascensu de los contaxos nunca vistu hasta'l momentu nun se traduz nuna presión hospitalaria esmolecedora. Hai ingresaos 301 pacientes con sospecha o confirmación de COVID-19, de los que 249 tán en planta y 52 na UCI, lo que supón una ocupación del 8,61 y del 17,16 por cientu, de manera respeutiva.

Otra manera, nos cuatro díes últimos hebo que llamentar la muerte de 17 persones con esta enfermedá: 3 muyeres de 92, 90 y 75 y 3 homes de 85, 76 y 73, el xueves; 3 homes de 92, 86 y 75 y 2 muyeres de 90 y 72, el vienres; 1 home de 94 y 4 muyeres de 92, 77, 75 y 48, el sábadu; y una muyer de 88, ayeri. La cantidá total del andanciu xube yá a 2.176.