La recuperación del históricu horru d’El Pedrosu afronta la recta final col so montaxe

Esta selmana l’históricu horru d’El Pedrosu, con pintures de la guerra contra los franceses, tará otra vuelta en pie. Si la meteoroloxía lo permite van finar los trabayos de restauración, con un plazu d'execución de seis meses, col montaxe nel llugar d’esti bien mueble con pieces orixinales y otres procedente d’otres construcciones.

L’aire fixo cayer en xunu del 2020 l’horru asitiáu na parte alta de Vis, llugar d’Amieva. Los vecinos movilizáronse rápido pa guardar les pieces, sobre manera aquelles que conteníen les pintures feches a lo primeros del sieglu XIX con escenes de la francesada, pa protexeles del mal tiempu, que según las estimaciones s'armaron ente'l 1680 y el 1720.

Cuasi trés años depués d’esi triste 4 de xunu’l pueblu va recuperar nel mesmu emplazamientu esa querida construcción. La empresa encargada de los trabayos, Carpintería Villaviciosa, reutiliza los pegoyos y les dos pegoyeres conservaes, asina como toles cureñes que se pudierono saniar y repasar, y tamién un cachu del lliñu oeste y una de les puertes de la construcción orixinal, apunten dende la conseyería.

Mentes, llimpióse y regularizóse’l solhorru y consolidóse’l terrén per aciu una muria perimetral na cara sur, xunto a la vía. La xubidoria oeste reconstruyiráse reutilizando la piedra esistente.

No que respeuta a les pintures, la intervención incluyó la fixación y selláu de les mesmes cola fin de frenar el deterioru provocáu poles condiciones ambientales, los fongos y el propiu esbarrumbu de la construcción. Estos testimonios gráficos sobre la francesada, fechos con carbón vexetal, constitúin un detalle singular que da al horru d’El Pedrosu un valor históricu relevante.

Usu del proyeutu 'Pegoyu, almacén d'horros'

La conseyera de Cultura, Política Llingüística y Turismu, Berta Piñán, y el direutor xeneral de Cultura y Patrimonu, Pablo León, desplazáronse esta mañana a Amieva pa presenciar los trabayos por parte de la empresa, que pudo facer usu del proyeutu ‘Pegoyu, almacén d’horros’ p’acceder a pieces recuperaes d’horros, paneres y cabazos que faciliten la restauración d’otres construcciones tradicionales. Nos Presupuestos del 2023 destináronse 40.000 euros pa recuperar l’horru d’El Pedrosu.

Na semeya, Piñán atiende a les esplicaciones sobre la obra.