El presupuestu de Cultura dedica 40.000 euros pa "llevantar y restaurar" l’horru d’El Pedrosu

|
Horru d'El Pedrosu en Vis cayíu detalle pintures

Dos años y mediu depués de cayer énte la pasividá de propietarios y alministraciones llega una partida nos Presupuestos pa recuperar l’horru d’El Pedrosu, que contaba con pintures de la guerra contra los franceses. Berta Piñán, conseyera de Cultura, Política Llingüística y Turismu, anunció esta actuación y l’impulsu del Plan d’Horros.

Fíxolo en Tinéu, nel Hotel Palacio de Merás, nun actu pa presentar les principales llinies del proyeutu del so departamentu nos Presupuestos del 2023. En total cuenta con 85,6 millones d’euros, cuasi 16 más que nel actual.

Ente les cuestiones nes que más calcó Piñán tuvo un plan de restauración patrimonial que comprende l’aprobación del primer Plan d’Horros cola intención de conservar y recuperar estos elementos etnográficos. Asina, esplicó que cuenta con una riestra de midíes que s’aplicarán los años próximos, como la modificación de la regulación d’estos elementos etnográficos cola fin d’ameyorar la so conservación y rehabilitación, y la definición de los usos nuevos a los que se podrán dedicar.

Xunto con otres midíes, el presupuestu prevé 100.000 euros pa la redación del Llibru Blancu del Horru, “aparte de dos subvenciones que yá taben y mantenemos, 15,000 y 10.000 euros destinaes a l’Asociación Amigos del Hórreo y a la Fundación CETEMAS, respeutivamente, pal desenvolvimientu del programa ‘Pegoyu, almacén d’horros’ puestu en marcha va unos meses”. Tamién citó l’aumentu hasta 350.000 euros de les subvenciones a particulares pa la restauración d’estos bienes.

Ente les actuaciones específiques ta la del horru d’El Pedrosu, pa la que se destinen 40.000 euros “pa volver a llevantar y restaurar l’horru tan emblemáticu de Vis, n’Amieva”. Ésti cayó en xunu del 2020 depués d’años de denuncies de los vecinos pol so mal estáu énte la pasividá de propietarios y alministraciones.

Una situación que llevó al desenllaz non queríu causáu pol aire, acabando con un horru con pintures con escenes de la guerra contra los franceses, nel entamu del sieglu XIX, con militares representaos bien conservaos, a caballu acompañáu d’un perru o con chuzos. Los propios vecinos encargáronse de recoyer les pieces con permisu de los dueños pa que nun se perdieran.

Por último, Piñán rescampló que la conseyería va destinar pa la conservación d’estos bienes patrimoniales y identitarios “imprescindibles na nuesa cultura” 515.000 euros del presupuestu.

1,2 millones pa restauración patrimonial

En total, les cuentes contemplen 1,2 millones pa la restauración patrimonial, de los que mediu millón van pal prerrománicu, con intervenciones na cripta de Santa Leocadia, Santa María del Naranco, San Pedro de Nora, La Foncalada y el proyeuto de sienda peatonal nel Naranco, amás de la renovación de la esposición permanente del Muséu Arqueolóxicu d’Asturies.

Otra novedá ye la dotación de 50.000 euros pa la Mesa del Camín Primitivu de Santiagu, que s’alcordó crear en xunetu. Esta asociación va constituyise nel 2023 y va tar integrada polos conceyos asturianos pelos que pasa esta ruta, asociaciones xacobees y el propiu Gobiernu.

Promoción turística

La conseyería va facer esti 2023 un gran esfuerciu en promoción turística aprovechando la llegada de la velocidá alta a Campumanes cola apertura de la variante de Payares. Va destinase 1 millón, que se suma a otru millón pa impulsar el turismu industrial.

Incrementu de les ayudes a clubes

El proyeutu de Presupuestos recueye un incrementu del 20 por cientu na llinia d’ayudes a los clubes deportivos pa la participación en competiciones d’altu nivel. La convocatoria va contar con una dotación de 450.000 euros, de los que 415.000 van ser pa clubes y 35.000 pa los premios a la escelencia deportiva.

Na semeya, detalle de les pintures del horru d'El Pedrosu, yá cayíu.

AdxuntuTamañu
Image icon Horru d'El Pedrosu detalle pintures76.44 KB
Contador Estadistiques