L’horru d’El Pedrosu, con pintures de la guerra contra los franceses, cayó énte la pasividá de propietarios y alministraciones

L’aire fixo cayer esti xueves l’horru d’El Pedrosu, asitiáu na parte alta de Vis, pueblu d’Amieva. Los vecinos, que veníen denunciando dende hai años el so mal estáu y pidíen la intervención de les alministraciones pa protexelu, consiguieron salvar les pintures que presentaba del tiempu de la guerra contra los franceses.

Asturies vivió ayeri otra importante perda del so patrimoniu. L’horru d’El Pedrosu cayía al meudía énte la pasividá de los propietarios y del Gobiernu.

“La culpa ye un poco de toos”, llamenta Toño Sánchez Cueto, miembru de l’Asociación de Vecinos de Vis y conceyal de Ciudadanos. Los propietarios foron avisaos hai un llustru de la importancia de les pintures que presentaba l’horru, con escenes de la guerra contra los franceses, dalgo que tamién se punxo en conocimientu de la Conseyería de Cultura.

Amieva foi llugar de pasu de tropes y posiblemente de combates, lo qu’esplica que dellos horros del conceyu presenten, seguramente obra de testigos de la época, dibuxos de soldaos, personaxes armaos o animales. El de Vis llucía dellos, con militares bien conservaos, a caballu acompañáu d’un perru o con chuzos, pero tamién se caltienen otros exemplos en construcciones de les poblaciones de Carbes y Santolaya.

Detalle de los dibuxos.

A pesar de contar con esta ayalga, la realidá ye que naide intervino y l’horru d’El Pedrosu siguió’l mesmu camín que’l de San Román hai cerca de 5 años. “El Conceyu nun tien medios económicos y nin los propietarios nin la conseyería fixeron nada. Unos por otros, al final cayó”, rellata Sánchez Cueto.

Cesión de los dueños

Los dueños del horru sí dieron permisu pa poder recuperar les pintures feches a lo primero del sieglu XIX. “Nel centru del pueblu hai 3 horros que tán en bon estáu y la nuesa idea ye colocales en dalgunos d’ellos pa que la xente pueda velos y nun se pierdan”, adelanta no que ye, dientro de la murnia situación, una allegría.

“Poco a poco tamos perdiendo’l nuesu patrimoniu”, añade esti vecín de Vis, que cifra en 8 o 10 los horros d’Amieva que tán bastante afeutaos. N’Asturies son munchos más los que puede sufrir el mesmu final que’l d’El Pedrosu: “A los dueños cuesta-yos munchos reparalos y habría que facer por ayudalos, o permitir que se-yos dea otros usos”, considera Sánchez Cueto, consciente de la importancia de caltener estes construcciones.

Asina yera l'horru d'El Pedrosu.