La primer y única prueba d’asturianu del 2020 adaptada al marcu européu va ser de nivel intermediu B2

Una comisión mesta y paritaria ente les conseyeríes de Cultura y Educación va facer el siguimientu de la convocatoria, ellaboración y calificación de les pruebes d’asturianu adaptaes al marcu européu, amás d’encargase de tolos temes referentes al enseñu del idioma. La del 2020 va ser de nivel intermediu B2, con 500 places.

El Boletín Oficial del Principáu d’Asturies (BOPA) de güei espubliza una resolución de la Conseyería de Cultura, Política Llingüística y Turismu pola que delega, “n’interés d’una mayor eficiencia del gastu públicu”, na Direición Xeneral d’Ordenación, Evaluación y Igualdá Educativa de la Consejería d’Educación “les competencies rellatives a la convocatoria, ellaboración, alministración, evaluación y calificación de les pruebas pa la obtención de los certificaos de los niveles de la llingua asturiana y a la espedición de dichos certificaos y les sos equivalencies”. Cultura resérvase “la competencia alministrativa de direición y coordinación relativa a diches titulaciones, certificaciones y les sos equivalencies”.

La resolución inclúi un anexu colos criterios xenerales de la delegación, rescamplando la creación d’una comisión mesta y paritaria “pa esaminar tolos temes referentes a la enseñanza reglada de la llingua asturiana, formación del profesoráu, titulaciones, llibros de testu, etc.”. Ésta tamién va encargase de facer un siguimientu de les pruebes de certificación de conocimientu d’asturianu adaptaes al Marcu Común Européu de Referencia pa les Llingües.

Esti primer añu namái va entamase una prueba, la correspondiente al nivel intermediu B2, con un tope de 500 aspirantes. Cultura afitó un total de 5 niveles, el básicu A1, el básicu A2, l’intermediu B1, l’intermediu B2 y l’avanzáu C1, y Educación va ser la responsable nos años vinientes de determinar les pruebes a convocar a propuesta de la comisión mesta y baxo la direición de Cultura.

Na semeya, Genaro Alonso, conseyeru d'Educación y Cultura na llexislatura anterior, cuando s'aprobó'l decretu qu'afita los niveles de competencia nel usu de la llingua asturiana adaptaes al Marcu Común Européu de Referencia pa les Llingües, xunto con Berta Piñán, conseyera actual de Cultura, Política Llingüística y Turismu, y Carmen Suárez Suárez, d'Educación.