Les primeres pruebes d'asturianu adaptaes al marcu européu van entamase esti añu

Espublizáu nel BOPA'l decretu qu'afita los niveles de competencia y regula les mesmes.

Yá pue consultase'l testu definitivu sobre les pruebes pa poder certificar el conocimientu en llingua asturiana, adaptaes al Marcu Común Européu de Referencia pa les Llingües. Nel casu asturianu va ser posible presentase a cinco niveles: básicu A1, básicu A2, intermediu B1, intermediu B2 y avanzáu C1.

La primer convocatoria va entamase esti mesmu añu, según confirma'l decretu, nuna fecha qu'anunciará'l próximo responsable de la Conseyería d'Educación y Cultura. Éstes van convocase, al menos, una vegada al añu en caún de los niveles.

La de gallego-asturiano, nel 2020

Sobre la prueba de certificación en gallego-asturiano, el decretu marca que "nel plazu d'un añu dende la espublización del presente" el conseyeru deberá llevar a Conseyu de Gobiernu'l proyeutu normativu. El Gobiernu asturianu da asina esti pasu depués de los pidimientos recibíos tanto d’autoridaes y coleutivos del occidente del país como de l’Academia de la Llingua Asturiana.

Na imaxe, Genaro Alonso, conseyeru d'Educación y Cultura en funciones. Semeya obra d'Armando Álvarez.