La presencia del asturianu na FIDMA amplíase con más empreses y un espaciu mayor pa eventos

|
Puestu d'Iniciativa pol Asturianu na FIDMA 2018

Iniciativa pol Asturianu cumple col oxetivu marcáu al final de la Feria Internacional de Muestres d’Asturies (FIDMA) del añu pasáu y va disponer d’un puestu más grande. D’esta forma van incorporase más empreses qu’empleguen l’idioma, hasta doblar la cifra del 2018, y va haber un espaciu mayor pa charres y presentaciones.

El pabellón 3 d’esti certame pol que pasaron 717.869 persones na edición pasada va repetir como sede del puestu que sirve d’escaparate pal llabor d’Iniciativa pol Asturianu y de les empreses a les que-yos cede espaciu. “Ye un llugar necesariu pa que se vea con total normalidá l’emplegu del asturianu por parte d’estes firmes, y un revulsivu pa les ventes de los sos productos. Pela FIDMA pasa toda Asturies y muncha xente de fuera y ye una bona oportunidá pa dase a conocer”, esplica Iván Llera, presidente escoyíu recién d’esta asociación.

L’ésitu de los dos años anteriores en repercusión y ventes ye un fechu, como amuesa que cinco de les seis empreses presentes l’añu pasáu vayan repetir. Namái Miguina de Pan nun va tar esti añu, anque por cuestiones personales que-yos imposibiliten asistir nes feches que se celebra la LXIII FIDMA, del 3 al 18 d’agostu.

Ediciones Trabe, Saltadera, CuatroGotes Producciones, Cartonajes Vir y la cervecera artesanal Ordum van tar, poro, presentes nesta ocasión, a les que se van sumar Cerveza Caleya y el Círculo Gijón Baloncesto y Conocimiento. Mentes, tán pendientes de confirmación otres firmes, anque dende Iniciativa pol Asturianu cifren en once, inclusive dalguna más, les que van llevar la so actividá y productos al puestu, animando al empar a profesionales y empreses a ponese en contautu cola organización estos díes pa sumase al proyeutu.

"Al traviés de la presencia na FIDMA, Iniciativa pol Asturianu quier mostrar como l’asturianu ye un elementu de creación empresarial, orixinando actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier facer ver como la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses", apunten.

Amás, el fechu de que’l tamañu del espaciu sía mayor va permitir que se pueda habilitar un güecu más ampliu pa presentaciones y firmes de llibros y inclusive charres. El coleutivu yá trabaya nun programa que se dará a conocer nes selmanes próximes.

Visites institucionales

Al igual que nos años pasaos, espérase que’l puestu sía un pasu fixu por parte de les munches autoridaes que se dexen cayer pela FIDMA mientres los sos 16 días de llargor. Ente los posibles tará Adrián Barbón, agora presidente d’Asturies, que l’añu pasáu yá lu visitó como candidatu acompañáu d’Adriana Lastra, vicesecretaria xeneral del PSOE y diputada por Asturies, y Gimena Llamedo, secretaria d'Organización de la FSA.

Contador Estadistiques