Catorce empreses qu’usen l’asturianu axúntense nel puestu d’Iniciativa na FIDMA pa presentar los sos productos y servicioss

|
Puestu d'Iniciativa pol Asturianu montaxe FIDMA 2019

El sábadu va abrir les sos puertes al públicu en Xixón la LXIII Feria Internacional de Muestres d’Asturies (FIDMA), onde la llingua asturiana va contar per tercer añu con un espaciu propiu. Iniciativa pol Asturianu comparte’l so puestu con catorce empreses pa que presenten los sos productos y servicios nesti certame pel que pasaron 717.869 persones mientres la edición pasada.

Esta cantidá supón más del doble que nel 2017, cuando seis firmes aceptaron la invitación de l’asociación. La bona esperiencia vivida y les ventes mientres los 16 díes de duración de la FIDMA faen repetir a cuatro d’elles, cola única ausencia de Miguina de Pan y, finalmente, d’Ordum.

Asina, les más de 700.000 persones qu’acudirán al Recintu Ferial Luis Adaro van atopar otra vegada nel puestu d’Iniciativa pol Asturianu nel pabellón ferial númberu 3, qu’aumenta esti añu en tamañu, los productos d’Ediciones Trabe, Saltadera, CuatroGotes Producciones y Cartonajes Vir. D’esta forma, otres diez empreses qu’empleguen de manera habitual l’asturianu pueden sumase al proyeutu: Cerveza Caleya, Círculo Gijón Baloncesto y Conocimiento, camisetes Puru Remangu, La Gijonesa, La Naveta, Nenyuri xestión cultural, Los Caserinos, 9mil Soluciones, Asturcón y Acuto Xuegos.

El mayor espaciu nel stand tamién va permitir entamar más eventos a lo llargo de la FIDMA, como presentaciones o firmes de llibros, o charres. Iniciativa pol Asturianu va anunciar el programa, pendiente entovía de zarrar dalgunes feches, nes hores próximes.

Na semeya, puestu nuevu d'Iniciativa pol Asturianu na FIDMA esta mañana enantes de comenzar col so montaxe.

Contador Estadistiques