El “espaciu d’alcuentru alredor de la llingua na FIDMA” busca crecer pa la edición próxima

|
Gimena Llamedo, Adriana Lastra y Adrián Barbón nel puestín d'Iniciativa pol Asturianu na FIDMA

L’interés d’empreses y la demanda de los ciudadanos fai que’l puestín d’Iniciativa pol Asturianu na Feria Internacional de Muestres d’Asturies (FIDMA) quede pequeñu. Esti “espaciu d’alcuentru alredor de la llingua”, como lu define Inaciu Galán, busca medrar.

“Esti añu yá quiximos amplialu y l’oxetivu ye algamar más espaciu pal puestu pa la edición próxima”, rellata’l presidente d’Iniciativa pol Asturianu, que valora como “estupenda” la segunda esperiencia del coleutivu nun certame pol que pasaron 717.869 persones mientres los sos 16 díes de llargor. “Hai delles empreses que nos comunicaron que quieren participar con nós y contar con más metros permitiríanos desendolcar tamién más actividaes”, esplica Galán.

Nesta edición promocionáronse y vendieron productos nel stand Ediciones Trabe, Saltadera, Miguina de Pan, CuatroGotes Producciones, Cartonajes Vir y la cervecera artesanal Ordum. Los más ésitosos foron los vasos de sidra de Miguina de Pan y los llibros ‘Les mil primeres pallabres n’asturianu’, de Trabe, y ‘Incorrectos’ de David Artime y ‘Trozos/Cachos’ de Berta Piñán, de Saltadera, amás de la camiseta nueva d’Iniciativa pol Asturianu.

Tanto Artime como Piñán foron dalgunos de los autores que participaron en firmes de llibros, una de les actividaes qu’atrayeron a más xente al espaciu. “Munches persones s’averaron estos díes, dalgunos de fuera d’Asturies que s’interesaron pola situación del idioma y mercaron inclusive llibros, destacando l’interés pola edición billingüe de Trabe de la ‘Odisea’”, apunta Galán.

Los visitantes, amás de conocer l’actividá d’Iniciativa pol Asturianu y de les empreses, tamién pudieron llevar un cartafueyu editáu pola organización de nome ‘Oficialidá ye llibertá’, “un decálogu coles conclusiones principales del seminariu qu’entamamos esti añu”. “Destacaría la presencia de públicos nuevos, gracies a la presencia nel puestu de la cerveza Ordum, y la ilusión qu’amosaba la xente cola cuestión de la oficialidá tres el panorama nuevu que s’abre anguaño”, asegura Galán.

Visites de Lastra y Barbón

Nel apartáu institucional, al igual que l’añu pasáu, hebo una importante presencia d’autoridaes interesaes polos conteníos del espaciu. Asina, visitaron el stand Adriana Lastra, vicesecretaria xeneral del PSOE y vocera socialista nel Congresu, xunto con Adrián Barbón y Gimena Llamedo, secretariu xeneral y secretaria d'Organización de la FSA, asina como’l coordinador xeneral d’Izquierda Xunida (IX), Ramón Argüelles y el voceru de la coalición na Xunta Xeneral, Gaspar Llamazares, y el grupu parllamentariu de Foro con Pedro Leal al frente.

L’alcaldesa de Carreño y los alcaldes de Llangréu y Cangas del Narcea, Amelia Fernández, Jesús Sánchez Antuña y José Víctor Rodríguez, de manera respeutiva, y numberosos ediles de tol país tamién pasaron mientres estos díes pol puestu, asina como l’eurodiputáu socialista Jonás Fernández. D’igual manera, nesta ocasión hebo un enfotu especial por convidar a coleutivos mozos, representantes vecinales, párrocos o deportistes, como l’ex NBA Robert Switf, xugador franquicia del Círculo –equipu xixonés qu’esti añu sal a competir en LEB Plata–, que llevó un exemplar del diccionariu inglés-asturianu de Galán.

Por último, el presidente d’Iniciativa pol Asturianu destacó “la montonera de socios que fiximos estos díes y l’esfuerciu de los voluntarios mientres les xornaes que duró la Feria”, al tiempu que yá trabaya pa que la organización cuente con un espaciu mayor pa visibilizar l’idioma y servir de puntu d’alcuentru alredor de la llingua asturiana nesti certame tan popular.

Na semeya, Galán mientres la visita de Llamedo, Lastra y Barbón.

Contador Estadistiques