La preinscripción pal proyeutu de formación p’adultos nes llingües del país Falamos ta abierta

|
Captura Falamos

Les persones interesaes en participar nos cursos semipresenciales de baldre de formación non reglada p’adultos n’asturianu y gallego-asturiano, Falamos, yá pueden facer la preinscripción. De les 42 hores llectives que se van desendolcar de setiembre a avientu 20 van ser en clase, dividíes en 8 sesiones, en llugares entovía por confirmar.

“La idea ye ofrecer formación p’adultos non reglada d’una manera estructurada p’acceder al deprendizaxe de les llingües d’Asturies”, esplica Antón García, direutor xeneral de Política Llingüística, a Asturies.com sobre esta iniciativa entamada xunto cola Federación Asturiana de Conceyos. “Paeznos que facelo en collaboración colos conceyos pue ser la meyor manera d’averanos a la sociedá. Ye una apuesta importante y esperamos qu’esta prueba pilotu salga bien”, añade.

Entrugáu pola posibilidá de que Falamos llegue a ser como los cursos de Galicia específicos pa preparar el Certificado de Estudos de Lingua Galega (CELGA), les pruebes de certificación de gallegu adaptaos adaptaos al Marcu Común Européu de Referencia pa les Llingües, apuntó que’l primer oxetivu ye “crear una estructura. Depués vamos ver lo que’l propiu alumnáu quier realmente. Habrá quién nun tenga interés en preparar los esámenes de conocimientu pero sí en recibir formación y habrá quién a lo meyor lo que necesita ye una plataforma que lu ayude a presentase a les pruebes. Una cosa o otra va ser bienllegada”.

Mínimu de 20 persones per clase

La primer edición de Falamos va desendolcase ente setiembre y avientu p’acumular un total de 42 hores llectives dende la selmana del 19 de setiembre, previsiblemente, a avientu. D’elles 22 son en llinia, mentes que 20, dividíes en 8 clases de 2,5 hores, siempre de tarde, van ser presenciales.

Entovía nun se conocen les places concretes onde van desendolcase estos cursos d’asturianu y gallego-asturiano, que van depender de la demanda de cada llugar, con un mínimu de 20 alumnos por aula. Una vegada fecha la preinscripción y, vista la cantidá de pidimientos, va ufrise a los solicitantes el sitiu más cercanu pa recibir les clases.

Al finalizar el cursu les persones que lu superen van poder "desenvolvese de manera suficiente en situaciones cotidianes y habituales, tanto cara a cara como al traviés de medios téunicos y n'entornos cotidianos nos que se producen cenciellos intercambios de calter habitual" y "comprender, producir, coproducir y procesar testos orales y escritos breves que versen sobre asuntos personales y cotidianos, y que contengan estructures cencielles".

Pue facer la preinscripción pa Falamos calcando equí.

Contador Estadistiques