Falamos arranca con más de 400 preinscritos y places completes n’Uviéu, Carreño y Mieres, qu’abre un segundu cursu

|
Cursos Falamos a 26 de setiembre

Esti llunes arranca en Mieres el primer de los cursos semipresenciales de baldre de formación non reglada p’adultos n’asturianu y gallego-asturiano. El proyeutu pilotu Falamos, que va llegar nun primer momentu a 13 conceyos, yá escosó places n’Uviéu, Carreño y precisamente, Mieres, onde se va poner un segundu dada la demanda.

“Dende hai años venimos detectando la necesidá d’ofrecer dende les instituciones públiques formación n’asturianu y eonaviego non reglada”, afirmó Antón García, direutor xeneral de Política Llingüística, na presentación de los cursos qu’arranquen güei en Mieres, al que va siguir el de Carreño’l llunes viniente. Una primer esperiencia que paez llamada a repetir l’añu qu’entra dau l’interés amosáu pola ciudadanía.

Son más de 400 les persones preinscrites nestos cursos de baldre en collaboración cola Federación Asturiana de Conceyos que se van impartir en 13 conceyos nun primer momentu, según confirmó García. “La valoración que podemos facer hasta’l momentu ye mui positiva”, afirmó.

Trés d’ellos tienen la matrícula completa –20 places como máximo–, Uviéu, Carreño y Mieres, mentes que ta abierta agora mesmo la matrícula n’otros cinco: Ribeseya, Llanes, Bimenes y Llangréu, a los qu’hai que sumar un segundu cursu en Mieres. Queden entovía por salir los de gallego-asturiano y por confirmase sedes nueves d’asturianu.

La primer edición de Falamos va desendolcase esti trimestre, hasta avientu, p’acumular un total de 42 hores. D’elles 22 son en llinia, mentes que 20, dividíes en 8 clases de 2,5 hores, siempre de tarde, van ser presenciales.

Contador Estadistiques