La Pola Siero va acoyer la gala del Premiu al Meyor Cantar

El vienres 30 va celebrase la gala del IX Premiu al Meyor Cantar nel Auditoriu de La Pola Siero. Anabel Santiago, Bacotexo, Fernando Valle Roso, La Tarrancha y Vrienden son los finalistes d'esta edición, que tien en cuenta les creaciones n'asturianu y gallego-asturiano del 2014 y 2015 al non convocase'l gallardón l'añu pasáu.

El direutor xeneral de Planificación Llingüística y Normalización, Fernando Padilla, presentó esta mañana, nun actu nel que tuvo acompañáu pol alcalde de Siero, Ángel Antonio García González 'Cepi', y pola miembru del xuráu Marta Mori, dicha gala del IX Premiu al Meyor Cantar, gallardón que convoca el Gobiernu pa premiar el meyor tema en llingua asturiana y gallego-asturiano del añu anterior "cola fin de consolidar, prestixar y arriquecer la creación musical asturiana". Nesta ocasión pudieron participar les creaciones feches nel 2014 y 2015, yá que l'añu pasáu nun se celebrara esti gallardón.

Ente toles propuestes recibíes, el xuráu formáu por Mori, Amparo Antuña, José Aurelio García González, Esther Fonseca y Iván Iglesias Fernández, con Lourdes Fernández como secretaria y Padilla como presidente, escoyó como finalistes a 'La lloca', d'Anabel Santiago (lletra de Xulio Arbesú); 'Teatro valleiro', de Bacotexo (Ricardo Saavedra); 'A mano izquierda del mundu', de Fernando Valle Roso (Ismael Arias); 'Tuntu', de La Tarrancha (Delfín Valdés); y 'Avérate', de Vrienden (Juan Ramón Duarte). Toos van defender en direuto'l día 30, de magar les 20 hores, los sos cantares nel Auditoriu de La Pola nuna gala na que tamién va actuar la Banda Gaitas El Trasno, ganador de la octava edición del premiu con 'Volviche'.

Mori, na so interenvención, destacó "la calidá y variedá" de tolos cantares presentaos, mientres que Cepi amosó la so satisfaición por poder acoyer la gala nel so conceyu tres dellos años celebrándose nel xixonés Teatru de la Llaboral. La entrada pa presenciar les actuaciones ye de baldre.

Na semeya, Cepi, Padilla y Mori.