Cinco formaciones defenden los sos temes na gala del IX Premiu al Meyor Cantar

Anabel Santiago, Bacotexo, Fernando Valle Roso, La Tarrancha y Vrienden participen esti vienres na gala del IX Premiu al Meyor Cantar, que debuta en La Pola Siero. Esti gallardón, recuperáu esti añu, escueye’l meyor tema del 2014 y 2015.

L’actriz María Cotiello y el cantante Xune Elipe presenten esta edición de la gala na que los cinco artistes y bandes que pasaron el primer corte del xuráu van defender los sos temes. Éstos son 'La lloca', d'Anabel Santiago (lletra de Xulio Arbesú); 'Teatro valleiro', de Bacotexo (Ricardo Saavedra); 'A mano izquierda del mundu', de Fernando Valle Roso (Ismael Arias); 'Tuntu', de La Tarrancha (Delfín Valdés); y 'Avérate', de Vrienden (Juan Ramón Duarte).

Darréu, la Banda Gaitas El Trasno, ganador de la octava edición del premiu con 'Volviche', va actuar mientres el xuráu toma la decisión final sobre quién merez ser ganador del Premiu al Meyor Cantar. El premiu va ser una obra orixinal de l’artista asturiana María Jesús Rodríguez.

L’aniciu de la gala, qu’esti añu debuta nel Auditoriu de La Pola Siero, ta previsto pa les 20 hores. La entrada pa presenciar l’espectáculu ye de baldre.