El IX Premiu al Meyor Cantar va tener en cuenta los temes del 2014 y 2015

L'ausencia del Premiu al Meyor Cantar l'añu pasáu lleva a la Conseyería d'Educación y Cultura a tener en cuenta los temes del 2014 pa la novena edición del gallardón. El plazu pa presentar creaciones fina'l día 15 d'esti mes.

El Premiu al Meyor Cantar pretende visibilizar el talentu de los creadores musicales qu'usen la llingua asturiana o'l gallego-asturianu en composiciones que sían orixinales y nueves dafechu. Dende la so creación, nel 2007, vieno premiando'l meyor tema del añu anterior, pero dao'l parón qu'hebo nesti gallardón l'añu pasáu, nesta novena edición la conseyería va tener tamién en cuenta los del 2014.

El plazu pa presentar creaciones fina'l vienres 15. Éstes han de ser obres musicales de creación orixinal, tanto na lletra como na música, quedando escluyíes, poro, les pieces tradicionales, les versiones o adaptaciones d'obres de creación publicaes orixinalmente n'otra llingua y los cantares que nun foran editaos y grabaos por primer vez nel 2014 o nel 2015.

Un xuráu presidíu por Fernando Padilla, direutor xeneral de Planificación Llingüística y Normalización, va escoyer, ente tolos aspirantes, al menos cinco finalistes que van participar na Gala del Premiu al Meyor Cantar, prevista pa finales de setiembre. La recompensa del ganador va ser una escultura orixinal y esclusiva d'un artista del país amás de la promoción y difusión del tema y grupu o artista vencedor.