La oficialidá del asturianu, en boca de toos

|
La oficialidá del asturianu, en boca de toos

La presentación del borrador de la comisión d’asturianu, l’apoyu de los conceyos de Xixón y Uviéu o les pallabres favoratibles del conseyeru Genaro Alonso tán provocando una serie de reaiciones sobre la oficialidá del asturianu. Mercedes Fernández destacó con unes declaraciones censurables sobre diputaos d’IX.

La selmana na que les XXXVI Xornaes Internacionales d’Estudiu qu’entama l’Academia de la Llingua Asturiana (ALLA) na Facultá de Filosofía y Lletres, cola presentación de la III Encuesta Sociollingüística d’Asturies por parte de Francisco José Llera Ramo, paecía que diben centrar el focu de l’actualidá al rodiu la llingua asturiana, una serie d’acontecimientos provocó que la oficialidá tea en boca de toos, inclusive llegando a ocupar portaes na prensa nacional. Como yera d’esperar, la igualdá de derechos de los falantes d’asturianu tuvo presente na inauguración d’esti eventu, pero l’alderique comenzó enantes.

El llunes presentábase’l borrador de la Comisión Especial d’Estudiu sobre'l Réxime de Proteición y Promoción del Asturianu, que defendía la cooficialidá “como únicu camín validu” pa la sobrevivencia de la llingua asturiana y del gallego-asturiano, asina como la propuesta de Xixón Sí Puede y Izquierda Xunida (IX) de llevar a Plenu’l pidimientu al Gobiernu d’entamar una reforma del Estatutu d’Autonomía pa incorporar la cooficialidá, que va votase mañana y que va apoyar Foro, cola dulda de la posición del PSOE. Mentes, n’Uviéu’l tripartitu siguía’l mesmu camín ayeri y el conseyeru d’Educación y Cultura, Genaro Alonso, declarábase favoratible a la oficialidá, anque recordaba que’l so llabor nel Gobiernu pa esta llexislatura yera’l desendolcu de la Llei d’Usu y Promoción del Bable/Asturianu.

Nesa mesma xornada, la popular Mercedes Fernández salía con unes declaraciones desafortunaes: “Probablemente yo fale más asturianu que la señora Masa, de Burgos; y que’l señor Llamazares, que ye de Logroño”, dixo tres posicionase en contra de la oficialidá. El voceru d’IX na Xunta Xeneral nun tardó n’afirmar que ve “xenofobia” nes pallabres de la so colega nel Parllamentu.

De manera paralela, un coleutivu de creación nueva en contra de la oficialidá convocaba per redes sociales una concentración pa oponese a esti derechu na plaza de la Casa Conceyu de Xixón con motivu del comienzu del Plenu, iniciativa que tuvo como altavoz los dos diarios nacionales. El resultáu ye que nun acudió nin una decena de persones, incluyíos ediles del Partido Popular (PP).

El Gobiernu caltién el refugu

Guillermo Martínez Suárez, conseyeru de Presidencia y Participación Ciudadana, confirmó esta mañana que’l Gobiernu caltién el refugu de la oficialidá del asturianu y gallego-asturiano. Asina, apuntó que les opiniones relevante d’Alonso son les que tien como conseyeru y non como filólogu, y ratificó que l’Executivu apuesta pola normalización, pero non pola oficialidá: “el programa eleutoral ye’l nuesu contratu cola ciudadanía”, afirmó.

Contador Estadistiques